ئىسرائىلىيە تاراتقۇلىرىنىڭ خەۋىرىگە قارىغاندا، رىمدا تەرەپلەر ئوتتۇرىسىدا داۋاملىشىۋاتقان ۋاسىتىلىك مۇزاكىرىلەرگە قارىماي، ئىسرائىلىيە ئارمىيەسى لىۋانغا قوشۇمچە ھەربىي ھۇجۇم قىلىش تاللانمىلىرىنى مۇزاكىرىلەشمەكتە.
ئىسرائىلىيە دۆلەتلىك تېلېۋىزىيەسى ئارمىيە مەنبەلىرىنى نەقىل كەلتۈرۈپ، ئىسرائىلىيە ئارمىيەسىنىڭ ھىزبۇللاھقا قايتۇرىدىغان ئىنكاسىنىڭ «تاماملانمىغانلىقىنى» ۋە «ئېنىق نىشانلىق مەخسۇس مەشغۇلاتلار» دەپ ئاتالغان بىر قىسىم تەدبىرلەرنى قارار قىلىش باسقۇچىدا تۇرۇۋاتقانلىقىنى ئاشكارىلىدى.
بۇ خەۋەرلەر لىۋان مەسئۇللىرى ئىتالىيە پايتەختىدە ئامېرىكا ۋاسىتىچىلىقىدا ئېلىپ بېرىلىۋاتقان سۆھبەتلەردە ئىسرائىلىيە ھۇجۇملىرىنىڭ كۆلىمىنى چەكلەشكە تىرىشىۋاتقان ھەمدە ۋاشىنگتوننىڭ ئىسرائىلىيەگە بېسىم ئىشلىتىپ ئۇرۇشنىڭ تېخىمۇ كەسكىنلىشىشىنىڭ ئالدىنى ئېلىشىنى ئۈمىد قىلىۋاتقان بىر پەيتكە توغرا كەلدى.
ھەربىي تاللانمىلار
ئىسرائىلىيە «13-قانىلى» نىڭ خەۋەر قىلىشىچە، ئىسرائىلىيە ئارمىيەسى يوشۇرۇن تەھدىتلەرگە قارىتا تەييەرلىقىنى داۋاملاشتۇرماقتا ھەمدە لىۋاننىڭ جەنۇبىغا قىلىنغان تۇنجى نۆۋەتلىك ھۇجۇمدىن كېيىن، يېقىنقى قوشۇمچە ھۇجۇملارنى ئېلىپ بارىدىغان تاللانمىلارنى ھازىرلىغان.
بۇنىڭدىن باشقا، «12-قانال» ئارمىيەنىڭ سىياسىي رەھبەرلىككە لىۋاندا «تېخىمۇ كۈچلۈك ۋە قەتئىي» ھۇجۇملارنى تەستىقلاشنى ئىلتىماس قىلغانلىقىنى خەۋەر قىلدى.
بۇ دوكلاتلار چارشەنبە كۈنى سەھەردە لىۋاننىڭ جەنۇبىدىكى مەجدەل زۇن رايونىدا بىر ئىسرائىلىيە قوشۇنىنى نىشانلىغان پارتلاشتىن كېيىن ئوتتۇرىغا چىقتى. ئىسرائىلىيە تەرەپنىڭ خەۋەر قىلىشىچە، پارتلاشتا ئەسكەرلەر يارىلانغان بولۇپ، ئېغىر يارىلانغان 4 ھەربىي خادىم ھەربىي تىك ئۇچار بىلەن رامبام تېببىي مەركىزىگە يۆتكەلگەن.
شۇنىڭ بىلەن بىر ۋاقىتتا، لىۋان دۆلەتلىك خەۋەر ئاگېنتلىقى ئىسرائىلىيەنىڭ تەبنىنە كەنتىگە قىلغان ھۇجۇمىدا 1 كىشىنىڭ ئۆلۈپ، 12 كىشىنىڭ يارىلانغانلىقىنى ھەمدە ئىسرائىلىيە ئارمىيەسىنىڭ رايوننى تاشلاپ چىقىپ كېتىش ھەققىدە ئاگاھلاندۇرۇشىدىن كېيىن مانسۇرى يېزىسىدىكى ئائىلىلەرنىڭ ئۆي – ماكانلىرىنى تاشلاپ چىقىپ كەتكەنلىكىنى خەۋەر قىلدى.
بۇ ئۆزگىرىشلەر لىۋان-ئىسرائىلىيە ۋاسىتىلىق سۆھبىتى ئىنتايىن ئاكتىپ داۋاملىشىۋاتقان ۋە تەشكىلىي يىغىنى رىمدا ئۆتكۈزۈلىۋاتقان مەزگىلگە توغرا كەلدى. بۇنىڭدىن ئىلگىرىكى 5 - نۆۋەتلىك سۆھبەت ئامېرىكانىڭ قوللىشى بىلەن ۋاشىنگتوندا ئۆتكۈزۈلگەن ئىدى.
لىۋان ئاممىۋى سەھىيە مىنىستىرلىقىنىڭ ئاشكارىلىشىچە، ئىسرائىلىيەنىڭ 2 - مارتتىن بۇيان لىۋانغا قىلغان ھۇجۇملىرىدا 4333 كىشى ئۆلۈپ، 12 مىڭ 250 كىشى يارىلانغان.
