ئىران تاشقى ئىشلار مىنىستىرى ئابباس ئاراقچى ئىجتىمائىي تاراتقۇ ھېسابىدا ئېلان قىلغان يازمىسىدا، فىرانسىيەنىڭ ئىراندا نامايىشچىلارنىڭ ئۆلۈم جازاسىغا ھۆكۈم قىلىنىشىغا قارىتا ئېلان قىلغان تەنقىدلىرىگە جاۋاب قايتۇردى.
ئاراقچى فىرانسىيەنىڭ ئىسرائىلىيەنىڭ غەززەدىكى قىرغىنچىلىقىغا تۇتقان پوزىتسىيەسىنى ئەسكەرتىپ مۇنداق دېدى: «فىرانسىيەگە ئوخشاش دۆلەتلەر دۇنياغا كىشىلىك ھوقۇق ۋە خەلقئارا قانۇن ھەققىدە ۋەز ئېيتىشنى توختىتىشى كېرەك. بۇ ئىككىيۈزلىمىچىلىك ئىنتايىن ئاشكارا ۋە نومۇس قىلارلىقتۇر. سىلەرنىڭ ئىسرائىلىيەنىڭ غەززەدىكى قىرغىنچىلىقىغا ۋە ئىرانغا قاراتقان تاجاۋۇزچىلىقىغا بەرگەن مەدىتىڭلار، ئۆزۈڭلارغا نىسبەت بېرىۋالغان بارلىق ئەخلاقىي ئۈستۈنلۈكنى ۋەيران قىلدى».
يەنە بىر تەرەپتىن، فىرانسىيە تاشقى ئىشلار مىنىستىرى ژان نوئېل بارروت (Jean-Noel Barrot) ئالدىنقى كۈنى بەرگەن باياناتىدا، ياۋروپا ئىتتىپاقى ۋە 26 دۆلەتنىڭ ئىراندا نامايىشچىلارنىڭ ئۆلۈم جازاسىغا ھۆكۈم قىلىنىشى ۋە قالايمىقان قولغا ئېلىنىشىنى بىرلىكتە تەنقىد قىلىپ ئورتاق بايانات ئېلان قىلغانلىقىنى ئۇقتۇرغان ئىدى.
