ئامېرىكا قوشما ئىشتاتلىرى پىرېزىدېنتى ترامپ نويابىردىكى تولۇقلىما سايلاملاردا جۇمھۇرىيەتچىلەرگە ئاۋاز بېرىش چاقىرىقى قىلىپ، قوللىغۇچىلىرىغا سايلام ساندۇقىغا بېرىش ھەققىدە قەسەم ئىچكۈزدى. ئۇ دېموكراتلارنىڭ غەلىبە قىلىشىنىڭ ئۆز ھۆكۈمىتىنىڭ ئىستراتېگىيەلىك پىلانلىرىغا تەھدىت ئېلىپ كېلىدىغانلىقى توغرىسىدا ئاگاھلاندۇردى. پەيشەنبە كۈنى كېچىدە تېكساسنىڭ داللاس شەھىرىدە ئۆتكۈزۈلگەن جۇمھۇرىيەتچىلەرنىڭ تولۇقلىما سايلام قۇرۇلتايىنىڭ يېپىلىش مۇراسىمىدا سۆز قىلغان ترامپ، قاتناشقۇچىلاردىن 3-نويابىر كۈنى ياكى بالدۇر ئاۋاز بېرىش مۇساپىسىدە بېلەت تاشلايدىغانلىقىغا، شۇنداقلا دوستلىرى ۋە ئائىلە ئەزالىرىنىمۇ بىللە ئېلىپ كېلىدىغانلىقىغا دائىر قەسەمنى تەكرارلىشىنى تەلەپ قىلدى.
ترامپ دېموكراتلارنى سايلامدا ساختىپەزلىك قىلىش بىلەن ئەيىبلەپ، قوللىغۇچىلىرىغا مۇنداق قەسەم ئىچكۈزدى: «ئامېرىكا قوشما ئىشتاتلىرى تارىخىدىكى ئەڭ بۈيۈك پىرېزىدېنتقا سادىق بولىمەن... دوستلىرىمنى، ئائىلەمنى بىللە ئېلىپ كېلىمەن ۋە 3-نويابىردا ياكى ئۇنىڭدىن بۇرۇن ئاۋاز بېرىمەن...»
قەسەمدىن كېيىن ترامپ سۆزلىرىگە ئىلاۋە قىلىپ: «ئاۋاز بەرمىسەڭلار نېمە بولىدىغانلىقىنى بىلەمسىلەر؟ دوزاخقا كىرىسىلەر» دېدى. ترامپ ئاۋام پالاتاسى ۋە كېڭەش پالاتاسىدا جۇمھۇرىيەتچىلەرنىڭ كونتروللۇقىنى ساقلاپ قېلىشقا ۋەدە بەردى. ئۇ ئەگەر دېموكراتلار قايتا ھاكىمىيەت بېشىغا چىقسا، تېكساس نېفىت ۋە تەبىئىي گاز سانائىتىنىڭ ۋەيران بولىدىغانلىقىنى ئىلگىرى سۈردى.
