يەرلىك مەنبەلەرنىڭ بىلدۈرۈشىچە، ئىسرائىلىيە ئارمىيەسى خان يۇنۇسنىڭ جەنۇبىدا ئۆي – ماكانلىرىدىن ئايرىلىپ قالغان پەلەستىنلىكلەر پاناھلىنىۋاتقان چېدىرلارنى نىشان قىلغان. ھۇجۇمدا بىر بالىنىمۇ ئۆز ئىچىگە ئالغان 3 كىشى ھاياتىدىن ئايرىلغان، كۆپ ساندا كىشى يارىلانغان.
ئىسرائىلىيە ئارمىيەسى غەززە رايونىنىڭ ئوخشىمىغان جايلىرىنى توپقا تۇتقان ۋە ھەربىي ئاپتوموبىللار بىلەن ئىلگىرىلەپ ھۇجۇملىرىنى داۋاملاشتۇرغان.
غەززە شەھىرىنىڭ شەرقىدىمۇ ئۆي – ماكانلىرىدىن ئايرىلىپ قالغان پەلەستىنلىكلەر تۇرۇۋاتقان چېدىرلارغا، ئىسرائىلىيە ئارمىيەسىگە تەۋە ئۇچقۇچىسىز ھاۋا ئاپپاراتلىرىدىن «ئوت تۇتاشغۇچى بومبىلار» تاشلانغان.
ئىسرائىلىيە ئارمىيەسى تۇففاھ مەھەللىسىدە بولسا ئارقىدا قالدۇرۇپ كەتكەن پارتلاتقۇچ بېسىلغان بىر ھەربىي ئاپتوموبىلنى يىراقتىن كونترول قىلىش ئۈسكۈنىسى ئارقىلىق پارتلاتقان.
ئىسرائىلىيە ئارمىيەسى غەززە رايونىدا 2025 - يىلى 10 - ئۆكتەبىردە يولغا قويۇلغان ئۇرۇش توختىتىش كېلىشىمىگە قارىماي، رايوندا ھەر كۈنى دېگۈدەك ھۇجۇملىرىنى داۋاملاشتۇرماقتا.
