رۇسىيەنىڭ دۆلەتلىك «‹تاسس› ئاگېنتلىقى» رۇسىيە دۆلەت مۇداپىئە مىنىستىرلىقىنىڭ رۇسىيە دېڭىز ئارمىيەسى مۇئاۋىن باش قوماندانى گېنېرال مايور مىخائىل گۇدكوۋنىڭ رۇسىيەنىڭ كۇرسك چېگرا رايونىدا ئۆلتۈرۈلگەنلىكىنى بىلدۈرگەنلىكىنى خەۋەر قىلدى.
پرىمورىيە ئۆلكىسىنىڭ ۋالىيسى ئولېگ كوجېمياكومۇ بۇنىڭدىن ئىلگىرى رۇسىيە دېڭىز ئارمىيەسى مۇئاۋىن باش قوماندانى مىخائىل گۇدكوۋنىڭ كۇرسك رايونىدا ھاياتىدىن ئايرىلغانلىقىنى دەلىللىگەن ئىدى.
كوجېمياكو پەيشەنبە كۈنى كۇرسك رايونىدا ھاياتىدىن ئايرىلغانلارنىڭ ئائىلە-تاۋابىئاتلىرى، دوستلىرى ۋە سەپداشلىرىغا تەزىيە بىلدۈردى.
كوجېمياكو گۇدكوۋنىڭ بىر ئوفىتسېر سۈپىتىدە ۋەزىپە ئۆتەش جەريانىدا سەپداشلىرى بىلەن بىرگە ھاياتىدىن ئايرىلغانلىقىنى تەكىتلەپ مۇنداق دېدى:
«ئۇنىڭ سادىق دوستى ۋە ئورتاق سەپدىشىمىز نارىمان شىخالىيېۋمۇ قوماندان بىلەن بىللە ھاياتىدىن ئايرىلدى.»
بۇنىڭدىن ئىلگىرى، رۇسىيە ۋە ئۇكرائىنانىڭ غەيرىي رەسمىي ھەربىي تېلېگرام قاناللىرى ئۇكرائىنانىڭ گۇدكوۋنىڭ كۇرسكنىڭ كورېنېۋو رايونىدىكى بىر قوماندانلىق مەركىزىگە قىلىنغان ھۇجۇمىدا باشقا 10 ئەسكەر بىلەن بىللە ئۆلگەنلىكىنى خەۋەر قىلغان ئىدى. بۇ ئۇچۇر رېيتېر ئاگېنتلىقى تەرىپىدىنمۇ خەۋەر قىلىندى.
گۇدكوۋ ئۇكرائىنا تەرىپىدىن ئۆلتۈرۈلگەن رۇسىيەنىڭ ئەڭ يۇقىرى دەرىجىلىك ھەربىي ئەمەلدارلىرىدىن بىرى ھېسابلىنىدۇ.
گۇدكوۋ ئۇكرائىناغا قارشى ھەربىي ھەرىكەتلەردە نامايەن قىلغان جاسارىتى تۈپەيلى مۇكاپاتلانغان ۋە كىيېۋ تەرىپىدىن «ئۇرۇش جىنايەتلىرىنى سادىر قىلىش» بىلەن ئەيىبلەنگەن ئىدى.
رۇسىيە پرېزىدېنتى ۋىلادىمىر پۇتىن مارت ئېيىدا گۇدكوۋنى دېڭىز ئارمىيەسى مۇئاۋىن باش قوماندانى قىلىپ ۋەزىپىگە تەيىنلىگەن ئىدى. بۇ ئۇچۇر كىرېمىل سارىيىنىڭ تور بېتىدىن ئورۇن ئالغان بىر باياناتتا ئېلان قىلىنغان ئىدى.
گۇدكوۋ كۇرسكتا ئۇرۇش قىلىۋاتقان رۇسىيە تىنچ ئوكيان فىلوتىغا قاراشلىق بىر دېڭىز ئارمىيەسى پىيادە ئەسكەرلەر بىرىگادىسىغا قوماندانلىق قىلغان ئىدى.
كۇرسكنىڭ بىر قىسىم رايونلىرى 2024-يىلى 8-ئايدا ئۇكرائىنا ئارمىيەسىنىڭ تۇيۇقسىز ھۇجۇم قىلىشى نەتىجىسىدە ئىشغال قىلىنغان ئىدى. بىراق، رۇسىيە بۇ يىلنىڭ باشلىرىدا بۇ رايونلارنى قايتۇرۇۋالغانلىقىنى ئېلان قىلغان ئىدى.
