ئامېرىكا پىرېزىدېنتى دونالد ترامپ ئاقسارايدا خىتاي دۆلەت رەئىسى شى جىنپىڭ شەرىپىگە بەرگەن كەچلىك زىياپەتتە ئىككى دۆلەت مۇناسىۋىتىگە يۇقىرى باھا بەردى.
ترامپ ئامېرىكا-خىتاي مۇناسىۋىتىنىڭ يېقىنقى مەزگىلدە ياخشىلانغانلىقىنى تەكىتلەپ: «ئىككى دۆلەت رەھبىرى بولۇش سۈپىتىمىز بىلەن، دۆلەت رەئىسى شى ئىككىمىز پەرقلىق تۈزۈملەرگە ۋەكىللىك قىلىدىغانلىقىمىزنى بىلىمىز؛ ئەمما خەلقلىرىمىز ئوتتۇرىسىدىكى رىشتە داۋاملاشماقتا. مۇناسىۋىتىمىز ئەزەلدىن بۇنداق ياخشى بولۇپ باقمىغان» دېدى. ترامپنىڭ ۋاشىنگتون بىلەن بېيجىڭ ئوتتۇرىسىدا ئۇزۇندىن بۇيان داۋاملىشىپ كېلىۋاتقان ئىختىلاپلارغا قارىماي قىلغان بۇ سۆزلىرىگە، ئىككى دۆلەت ئوتتۇرىسىدىكى دوستلۇقنىڭ ئىپادىسى دەپ باھا بېرىلدى.
كەينىدىن سۆزگە چىققان خىتاي دۆلەت رەئىسى شى جىنپىڭ ترامپ بىلەن سەمىمىي ۋە چوڭقۇر پىكىر ئالماشتۇرغانلىقىنى ھەمدە نۇرغۇن مەسىلىلەردە ئورتاق تونۇشقا كەلگەنلىكىنى بىلدۈردى. شى جىنپىڭ: «بۇ ئۇچرىشىش ئىستراتېگىيەلىك مۇقىملىقنى ئاساس قىلغان خىتاي-ئامېرىكا مۇناسىۋىتىگە يېڭىچە مەزمۇن قوشتى ۋە قوش تەرەپلىك مۇناسىۋەتنى يېڭى ئىستراتېگىيەلىك يول خەرىتىسى بىلەن تەمىنلىدى» دېدى.
ئۇ ئالتە ئايغا يەتمىگەن ۋاقىت ئىچىدە ئۆزئارا ئېلىپ بېرىلغان رەسمىي زىيارەتلەرنى ئىككى تەرەپلىك مۇناسىۋەتتىكى «تارىخىي خاراكتېرلىك» ئىلگىرىلەش دەپ ئاتىدى. شۇنداقلا، ئىككى دۆلەتنىڭ مەسئۇلىيەتچان چوڭ دۆلەت سۈپىتىدە ھەرىكەت قىلىشى كېرەكلىكىنى ئېيتىپ: «خەلقلىرىمىزنىڭ ئارزۇسىنى قاندۇرۇشىمىز، دەۋر ئېقىمىغا يېتىشىشىمىز ۋە چوڭ دۆلەتلەرنىڭ ئۆزئارا ئىناق ئۆتۈشى ئۈچۈن يېڭىچە يۆنىلىش يارىتىشىمىز لازىم» دېگەنلەرنى قەيت قىلدى.
