جۇمھۇر رەئىس ئەردوغان، 2024-يىلنىڭ ئاخىرقى ھەپتىلىرىدە سۈرىيەدە پارلىغان ئەركىنلىك ۋە ئادالەت قۇياشىنىڭ 2025-يىلى ئۇرۇش ئايروپىلانلىرى زۇلمەتكە چۈمدۈرگەن غەززە ئاسمانلىرىدىمۇ پارلىشىنى ئۈمىد قىلىدىغانلىقىنى بىلدۈرۈپ: «13 يىل مابەينىدە سۈرىيەنى يالغۇز تاشلاپ قويمىغىنىمىزدەك، 2023-يىلى 7-ئۆكتەبىردىن بۇيان زۇلۇمغا ئۇچراۋاتقان پەلەستىنلىك قېرىنداشلىرىمىزنىمۇ يالغۇز تاشلاپ قويمىدۇق. ھەرخىل يوللار ئارقىلىق ئەۋەتكەن 100 مىڭ توننىلىق ئىنسانىي ياردەم بىلەن غەززەلىك مەزلۇملارنىڭ يۈكىنى ئازراق بولسىمۇ يېنىكلىتىشكە تىرىشتۇق» دېدى.
ئەردوغان تۈركىيەنىڭ پەلەستىن دۆلىتىنى تېخىمۇ كۆپ دۆلەتلەرنىڭ ئېتىراپ قىلىشى ئۈچۈن دىپلوماتىك ساھەدە ئېلىپ بېرىلىۋاتقان بارلىق تىرىشچانلىقلارنى قوللىغانلىقىنى ھەم ئۇلارغا يېتەكچىلىك قىلغانلىقىنى ئىپادىلىدى ۋە سۆزىنى داۋاملاشتۇرۇپ: «ئىسرائىلىيە بىلەن سودا مۇناسىۋىتىنى تولۇق توختاتقان بىردىنبىر دۆلەت يەنىلا تۈركىيە بولدى» دېگەنلەرنى قەيت قىلدى.
غەززەدىكى قىرغىنچىلىقنىڭ تېزدىن توختىتىلىشى ۋە مەڭگۈلۈك تىنچلىققا بارىدىغان يولنىڭ ئېچىلىشى ئۈچۈن كۈچلۈك تىرىشچانلىق كۆرسىتىۋاتقانلىقىنى تەكىتلىگەن ئەردوغان: «سۈرىيەدە دېگىنى توغرا چىققان تەرەپ بىز بولغان بولساق، غەززە كىرىزىسىدىمۇ تارىخ بىزنىڭ ئورۇنلۇق ئىكەنلىكىمىزنى ئىسپاتلايدۇ. (ئۇلار) تۈركىيەنىڭ ئادالەت، تىنچلىق ۋە مېھرى-شەپقەت تەرەپدارى پوزىتسىيەسىنىڭ توغرا ئىكەنلىكىنى كۆرىدۇ» دېگەنلەرنى سۆزلىرىگە ئىلاۋە قىلدى.
