شىنخۇا ئاگېنتلىقىنىڭ خەۋىرىگە ئاساسلانغاندا، شى جىنپىڭ ئامېرىكا پىرېزىدېنتى دونالد ترامپنى بېيجىڭدىكى خەلق سارىيىدا كۈتۈۋېلىش جەريانىدا، تەيۋەن مەسىلىسىنىڭ «خىتاي-ئامېرىكا مۇناسىۋەتلىرىدىكى ئەڭ مۇھىم مەسىلە» ئىكەنلىكىنى بىلدۈرۈپ: «توغرا بىر تەرەپ قىلىنسا، ئىككى تەرەپ مۇناسىۋەتلىرى ئومۇمىي جەھەتتىن تۇراقلىشىدۇ. ئەكسىچە بولغاندا، ئىككى دۆلەت ئوتتۇرىسىدا سۈركىلىشلەر ۋە ھەتتا توقۇنۇشلار يۈز بېرىشى مۇمكىن؛ بۇ بارلىق مۇناسىۋەتنى زور بىر خەتەرگە ئېتىپ قويىدۇ» دېگەن.
شى تەيۋەن بوغۇزىدىكى تىنچلىقنىڭ، تەيۋەن مۇستەقىل بولغان ئەھۋالدا «ئوت بىلەن سۇدەك سىغىشماس» بولىدىغانلىقىنى ئىپادىلەپ: «تەيۋەن بوغۇزىدا تىنچلىق ۋە مۇقىملىقنى قوغداش، ئىككى دۆلەت ئوتتۇرىسىدىكى ئەڭ چوڭ ئورتاق مەنپەئەتتۇر» دېگەن.
ئوتتۇرا شەرقتىكى توقۇنۇشلار، تەيۋەن، سودا ۋە باجلار ئىككى رەھبەر ئوتتۇرىسىدىكى سۆھبەتلەردە كۈنتەرتىپنىڭ ئالدىنقى قاتارىدىن ئورۇن ئېلىشى كۈتۈلۈۋاتقان تېمىلار قاتارىدا ئىدى.
ترامپ دۈشەنبە كۈنى، ئامېرىكانىڭ تەيۋەن مۇداپىئەسىنى قوللىشىغا ئالاقىدار سوئاللارغا قاراتقان جاۋابىدا «بۇ تېمىنى رەئىس شى بىلەن سۆزلىشىمەن... رەئىس شى بىزنىڭ بۇنداق قىلماسلىقىمىزنى خالايدۇ، مەن يەنىلا بۇ تېما ھەققىدە سۆزلىشىمەن. سۆزلىشىدىغان نۇرغۇن ئىشلىرىمىزنىڭ بىرىمۇ دەل مۇشۇ» دېگەنىدى.
«The New York Times» نىڭ خەۋىرىگە ئاساسلانغاندا، ئىككى پارتىيە ۋەكىللىرىدىن تەركىب تاپقان بىر گۇرۇپپا كېڭەش پالاتا ئەزالىرى، ترامپنى ئايلاردىن بۇيان ئامېرىكا تاشقى ئىشلار مىنىستىرلىقىدا ساقلىتىپ قويۇلغان رېكورت سەۋىيەدىكى 14 مىليارد دوللارلىق تەيۋەن قورال-ياراغ ياردەم پىلانىنى ئەمەلىيلەشتۈرۈشكە چاقىرغان.
تەيۋەننى قورال بىلەن تەمىنلىگۈچى ئەڭ چوڭ دۆلەت بولغان ئامېرىكا، ئۆتكەن يىلى 11 مىليارد دوللارلىق قورال سېتىشنى تەستىقلىغان بولۇپ، بۇ بېيجىڭ تەرەپنىڭ نارازىلىق بىلدۈرۈشىگە سەۋەب بولغانىدى.
خىتاي تەيۋەنگە «بۆلگۈنچى ئۆلكە» دەپ قارىسا، تەيبېي 1949-يىلىدىن بۇيان مۇستەقىللىقىنى جاكارلاشتا چىڭ تۇرماقتا.
