بىرلەشكەن دۆلەتلەر تەشكىلاتى باش كاتىپى ئانتونىئو گۇتېررېس، بىرمادا 50 كىشى ھاياتىدىن ئايرىلغان ھاۋا ھۇجۇمىنى «قاتتىق» ئەيىبلىدى.
ب د ت باش كاتىپىنىڭ باياناتچىسى ستېفان دۇجاررىك كۈندىلىك ئاخبارات ئېلان قىلىش يىغىنىدا سۆز قىلدى.
«ئاراكان ئۆلكىسىدە 28-سېنتەبىردە يۈز بەرگەن، 50 كىشىنىڭ ئۆلۈشىگە، تەخمىنەن 60 كىشىنىڭ يارىلىنىشىغا سەۋەب بولغان ھاۋا ھۇجۇمىغا ئالاقىدار خەۋەرلەردىن ئەندىشە قىلىۋاتىمىز» دېگەن دۇجاررىك، باش كاتىپنىڭ ھۇجۇملارنى «قاتتىق ئەيىبلىگەنلىكىنى» بىلدۈردى.
دۇجاررىك يارىلانغانلارنىڭ كۆپىنچىسىنىڭ ئەھۋالىنىڭ ئېغىر ئىكەنلىكىگە دىققەتلەرنى تارتىپ، ھاياتىدىن ئايرىلغانلارنىڭ ئائىلە-تاۋابىئاتلىرىغا تەزىيەسىنى يەتكۈزدى.
باش كاتىپ گۇتېررېسنىڭ بارلىق تەرەپلەرنى زوراۋانلىقنى دەرھال ئاخىرلاشتۇرۇشقا چاقىرغانلىقىنى بىلدۈرگەن دۇجاررىك، ئۇنىڭدىن سىرت ئالاقىدار ھاۋا ھۇجۇمىنى قىلغانلارنىڭ ھېساب بېرىشى كېرەكلىكىنى تەكىتلىدى.
ب د ت كىشىلىك ھوقۇق ئالىي كومىسسارى ۋولكېر تۈركمۇ بىرمانىڭ ئاراكان ئۆلكىسىدە بىر بازارغا يېقىن جايدا ئېلىپ بېرىلغان ۋە ئاز دېگەندە 50 كىشىنىڭ ئۆلۈشىگە سەۋەب بولغان ھاۋا ھۇجۇملىرىنى ئەيىبلىگەنلىكىنى ئېلان قىلغان ئىدى.
