ئۇزۇن يىللاردىن كېيىن ئۆز دۆلىتىنىڭ ئازاد قىلىنغانلىقىنى قىزغىن قارشى ئالىدىغانلىقىنى بايان قىلغان زىن مۇنداق دېدى: «يولىمىز ئېچىلدى، ئەسەد قاچتى، ئۇرۇش ئاخىرلاشتى. مەن ئىستانبۇلدا 10 يىل تۇردۇم، ئاللاھ تۈركلەرگە بەخت ئاتا قىلسۇن، ئۇلار بىزگە كۆپ ياردەم قىلدى.»

ئەلى ھاسىكو ئۆزلىرىنىڭ يۇرتى ھاماغا قايتىشنى 12 يىلدىن بېرى ساقلاۋاتقانلىقىنى ئەسكەرتىپ، تۈركىيەگە مىننەتدارلىقىنى بىلدۈردى ۋە: «تۈركىيەنىڭ بىزگە ئىشىكىنى ئاچقانلىقىغا رەھمەت ئېيتىمەن» دېدى.

ئىبراھىم ئەل مۇتامۇ 6 كىشىلىك ئائىلىسىدىكىلەر بىلەن ھاماغا قايتىشنى كۈتۈۋاتقانلىقىنى ئېيتتى.

تۈركىيەدە تەخمىنەن 11 يىل تۇرغانلىقىنى بايان قىلغان ئەل مۇتا: «ئاللاھقا شۈكرى، ئۇرۇش ئاخىرلاشتى، تۈركىيە بەك گۈزەل، ئەمما ۋەتىنىمىز سۈرىيەدۇر» دېدى.

سۈرىيەدە 27-نويابىردا (2024) ھاكىمىيەت كۈچلىرى بىلەن ئۆكتىچى قوراللىق گۇرۇپپىلار ئارىسىدا توقۇنۇشلار كەسكىنلەشكەن ئىدى.

پايتەخت دەمەشىققە 7-دېكابىردا كىرىشكە باشلىغان ئۆكتىچى گۇرۇپپىلارنى خەلق ئاممىسىنىڭمۇ قوللاپ قۇۋۋەتلىشى بىلەن، ھاكىمىيەت دەمەشىق ۋە باشقا نۇرغۇن رايونلاردا كونتروللۇقىنى پۈتۈنلەي يوقىتىپ، يىقىلغان ئىدى.

تۈنۈگۈن (2024-يىلى 8-دېكابىر) بائاس پارتىيەسىنىڭ دۆلەتتىكى 61 يىللىق ھاكىمىيىتى ئاياغلاشقان ۋە ھاكىمىيەت رەھبىرى بەششار ئەسەد پايتەخت دەمەشىقتىن قاچقان ئىدى.