رۇسىيە ياپونىيەدىن ئۆز زېمىنىغا ئورۇنلاشتۇرۇلغان ئامېرىكانىڭ «Typhon» تىپلىق باشقۇرۇلىدىغان بومبا سىستېمىلىرىنى چىقىرىۋېتىشنى تەلەپ قىلدى.
رۇسىيە تاشقى ئىشلار مىنىستىرلىقى باياناتچىسى مارىيا زاخاروۋا ئېلان قىلغان يازما باياناتىدا، ئامېرىكانىڭ مەزكۇر باشقۇرۇلىدىغان بومبا سىستېمىلىرىنىڭ ياپونىيەنىڭ كىيۇشۇ ئارىلىغا ئورۇنلاشتۇرۇلغانلىقىنى ئەسكەرتتى. زاخاروۋا بۇ مەسىلىگە قارىتا 3-سېنتەبىر كۈنى ياپونىيەنىڭ موسكۋادا تۇرۇشلۇق ئەلچىخانىسىغا نوتا تاپشۇرۇلغانلىقىنى قەيت قىلىپ، بۇ ئەھۋالنىڭ رۇسىيەنىڭ دۆلەت خەۋپسىزلىكى ۋە رايون خەۋپسىزلىكىگە تەھدىت شەكىللەندۈرگەنلىكىنى بىلدۈردى.
باياناتتا مۇنداق دېيىلدى:
«ياپونىيەگە بۇ سىستېمىلارنىڭ ھەرقانداق سەۋەب بىلەن ياكى مۇددىتىنىڭ قانداق بولۇشىدىن قەتئىينەزەر ئۆز زېمىنىغا ئورۇنلاشتۇرۇلۇشىنىڭ قوبۇل قىلىنمايدىغانلىقى ئۇقتۇرۇلدى. ياپونىيە تەرەپتىن بۇ خىل ھەرىكەتلەرنى توختىتىش ۋە مەزكۇر سىستېمىلارنى زېمىنىدىن چىقىرىۋېتىش تەلەپ قىلىندى. شۇنىڭ بىلەن بىر ۋاقىتتا، ياپونىيە ھۆكۈمىتىنىڭ جەنۇبىي كۇرىل ئاراللىرىغا مۇناسىۋەتلىك زېمىن مەسىلىسىنىمۇ ئۆز ئىچىگە ئالغان ئىككىنچى دۇنيا ئۇرۇشىنىڭ نەتىجىلىرىنى قوبۇل قىلىشى ۋە قايتا قوراللىنىش سىياسىتىدىن ۋاز كېچىشى كېرەكلىكى تەكىتلەندى.»
باياناتچى مارىيا زاخاروۋا يەنە خىتاينىڭمۇ ياپونىيەگە مۇشۇنىڭغا ئوخشاش بىر نوتا تاپشۇرغانلىقىنى سۆزلىرىگە ئىلاۋە قىلدى.
