خىتاي باش مىنىستىرى لى چياڭ دۈشەنبە كۈنى ئاۋسترالىيە باش مىنىستىرى ئانتونىي ئالبانېزېغا، بېيجىڭنىڭ «تېخىمۇ پىشقان ۋە مۇقىم بولغان خىتاي-ئاۋسترالىيە ئىستراتېگىيەلىك شېرىكلىكى»نى بەرپا قىلىشقا تەييار ئىكەنلىكىنى ئېيتتى.
خىتاي خەۋەر ئاگېنتلىقى شىنخۇا، مالايشىيادا ئۆتكۈزۈلگەن شەرقىي جەنۇبىي ئاسىيا دۆلەتلىرى ئىتتىپاقى (ئاسېئان) باشلىقلار يىغىنى جەريانىدا ئېلىپ بېرىلغان سۆھبەتتە، لى چياڭنىڭ ئاۋسترالىيە بىلەن بولغان ئىستراتېگىيەلىك ئالاقىنى ساقلاپ قېلىش ۋە ئۆزئارا مەنپەئەت يەتكۈزىدىغان ھەمكارلىقنى كېڭەيتىش ئارزۇسىنى بىلدۈرگەنلىكىنى خەۋەر قىلدى.
لى چياڭ خىتاينىڭ ئاۋسترالىيە بىلەن يېشىل ئىقتىساد، يۇقىرى تېخنىكىلىق كەسىپلەر ۋە رەقەملىك ساھە قاتارلىق ساھەلەردە ھەمكارلىق يوشۇرۇن كۈچىنى بايقاش ئۈچۈن خىزمەت قىلىشقا تەييار ئىكەنلىكىنى بىلدۈرۈش بىلەن بىرگە، كانبېررا ھۆكۈمىتىنى خىتاي كارخانىلىرى ئۈچۈن «ئوچۇق، سۈزۈك ۋە كەمسىتىش خاراكتېرلىك بولمىغان مۇھىت» يارىتىپ بېرىشكە چاقىردى.
ئاۋسترالىيە تاراتقۇسى — ABC نىڭ خەۋەر قىلىشىچە، ئالبانېزې لى چياڭ بىلەن كۆرۈشكەندە، ئۆتكەن چارشەنبە كۈنى جەنۇبىي خىتاي دېڭىزى ئۈستىدە خىتاي ئارمىيەسىنىڭ بىر ئاۋسترالىيە ھەربىي ئايروپىلانىنى قوغلاپ چىقىرىش ۋەقەسىنى كۈنتەرتىپكە ئېلىپ كەلگەن.
ياۋروپا كېڭىشى باشلىقى ئانتونىيو كوستا بىلەن ئۆتكۈزگەن يەنە بىر ئايرىم سۆھبەتتە، لى چياڭ خىتاي بىلەن ياۋروپا ئىتتىپاقى ئوتتۇرىسىدىكى ئالاقىلەرنىڭ «تەرەققىيات پۇرسەتلىرى، ھەم يېڭى قىيىنچىلىقلارغا دۇچ كېلىۋاتقانلىقى»نى ۋە ھەر ئىككى تەرەپنىڭ ئالاقىلەرنى توغرا يولدا ساقلاپ قېلىشى كېرەكلىكىنى ئېيتتى.
يەنە، ئالبانېزې دۈشەنبە كۈنى ئاسېئان – ھىندى ئوكيان-تىنچ ئوكيان مۇنبىرى (2025-يىلى) دا سۆزلىگەن نۇتۇقىدا، كانبېررانىڭ شەرقىي جەنۇبىي ئاسىيادا 20 مىليارد ئاۋسترالىيە دوللىرى (13 مىليارد ئامېرىكا دوللىرى) قىممىتىدىكى مەبلەغ سېلىش لىنىيەسىنى بېكىتكەنلىكىنى بىلدۈردى.
مالايشىيانىڭ بېرناما خەۋەر ئاگېنتلىقىنىڭ خەۋەر قىلىشىچە، ئالبانېزې: «ئاۋسترالىيە لائوستا يېزا ئىگىلىكى، تايلاندتا ئېنېرگىيە، ۋىيېيتنامدا ئۇل ئەسلىھە ۋە پۈتۈن شەرقىي جەنۇبىي ئاسىيادىكى تول (گۇرۇھى) قاتناش ۋە تەمىنلەش ساھەسىدە يېڭى مەبلەغلەرنى سېلىۋاتىدۇ» دېگەنلەرنى قەيت قىلغان.
