تۈركىيە جۇمھۇرىيىتى جۇمھۇر رەئىسلىك مەھكىمىسى 7-نۆۋەتلىك خەلقئارالىق يەلكەنلىك كېمە مۇسابىقىسىنىڭ بىرىنچى باسقۇچى بولغان «مىللىي ئىگىلىك ھوقۇق لوڭقىسى»نى تالىشىش مۇسابىقىسى «23-ئاپرېل مىللىي ئىگىلىك ھوقۇق ۋە بالىلار بايرىمى»نىڭ جۇشقۇن كەشىپىياتى ئىچىدە ئىستانبۇل بوغۇزىدىن باشلاندى.
جۇمھۇر رەئىسلىك مەھكىمىسىنىڭ ھامىيلىقىدا، مەدەنىيەت ۋە ساياھەت مىنىستىرلىقى ھەمدە ياشلار ۋە تەنھەرىكەت مىنىستىرلىقىنىڭ قوللىشى بىلەن ئىستانبۇل ئوچۇق دېڭىز يەلكەنلىك كېمە مۇسابىقىسى كۇلۇبى تەرىپىدىن ئۇيۇشتۇرۇلغان بۇ مۇسابىقىگە 14 دۆلەتتىن 500 تەنھەرىكەتچى قاتناشتى. ماھىرلار چاناققەلئەگە قاراپ يولغا چىقتى.
دولماباھچىدا مۇستاپا كامال ئاتاتۈرك ۋە ئۇنىڭ سەپداشلىرىنى ياد ئېتىپ سۈكۈتتە تۇرۇش بىلەن باشلىنىپ، 3 سائەتتىن ئارتۇق داۋاملاشقان مۇسابىقىدە، تەنھەرىكەتچىلەر شامال ۋە قىيىن ئۆتكەللەرگە قارشى ئىستراتېگىيە ھەل قىلغۇچ رول ئوينايدىغان بىر مۇسابىقىنى نامايان قىلدى. ئىستانبۇل خەلقىمۇ يەلكەنلەرنىڭ «23-ئاپرېل» تەنتەنىسى بىلەن جەم بولغان بۇ كاتتا تاماشاسىىغا شاھىت بولدى.
«مىللىي ئىگىلىك ھوقۇق لوڭقىسى»نى قولغا كەلتۈرۈش ئۈچۈن بەيگىگە چۈشكەن كوماندا ئەزالىرى بوغۇز باسقۇچىنى تاماملاپ، چاناققەلئەگە قاراپ يەلكەن ئاچتى.
ئىستانبۇل ئوچۇق دېڭىز يەلكەنلىك كېمە مۇسابىقىسى كۇلۇبىنىڭ رەئىسى ئەكرەم يەملىھائوغلۇ ھەر بىر باسقۇچنىڭ ئۆزىگە خاس روھى ۋە ھېكايىسى بارلىقىنى تەكىتلەپ: «بىز بالىلىرىمىزنىڭ 23-ئاپرېل مىللىي ئىگىلىك ھوقۇق ۋە بالىلار بايرىمىنى تەبرىكلەيمىز. جۇمھۇر رەئىسلىك مەھكىمىسى 7-نۆۋەتلىك خەلقئارالىق يەلكەنلىك كېمە مۇسابىقىسى پەقەت بىر تەنھەرىكەت پائالىيىتىلا بولۇپ قالماستىن، بەلكى ئوخشاش ۋاقىتتا تۈركىيەنىڭ دېڭىزدىكى كۈچىنى دۇنياغا نامايان قىلىدىغان بىر نوپۇز كۆرگەزمىسى خاراكتېرىگە ئىگە. مەقسىتىمىز بۇ ئالاھىدە كۈنلەرنىڭ مەنىۋىيىتىنى دېڭىزدىكى كۈرىشىمىز بىلەن بىرلەشتۈرۈش، بايرىقىمىزنى خەلقئارا دېڭىز تەۋەلىكىدە پەخىرلەنگەن ھالدا لەپىلدىتىش ۋە بۇ تەنھەرىكەتنى كېيىنكى ئەۋلادلارغا ئەڭ كەسپىي ئۇسۇلدا يەتكۈزۈشتۇر» دېدى.
تارىخقا ھۆرمەت مۇسابىقىسى
چاناققەلئە غەلىبىسىنىڭ 111 يىللىقى مۇناسىۋىتى بىلەن ئۆتكۈزۈلگەن «تارىخقا ھۆرمەت مۇسابىقىسى»دە تەنھەرىكەتچىلەر چاناققەلئەنىڭ شىددەتلىك شامىلىغا قارشى ئىلگىرىلەيدۇ.
104 دېڭىز مىلىلىق مۇساپىدە قىيىن كۈرەشلەرنى قىلىدىغان كوماندا ئەزالىرى ئىچىدە چاناققەلئەگە ئەڭ بۇرۇن يېتىپ بارغان كوماندا «ساقچى پاراخوتى لوڭقىسى» (Sahil Güvenlik Kupası)نىڭ ساھىبى بولىدۇ.
مۇسابىقىگە قاتناشقۇچىلار 25-ئاپرېل كۈنى چاناققەلئە بوغۇزىدا مۇسابىقىنى داۋاملاشتۇرىدۇ. ئۈچ كۈن داۋاملىشىدىغان مۈشكۈل مۇسابىقىلەردىن كېيىن، غەلىبە قىلغان كوماندا «زەفەر لوڭقىسى»غا ئېرىشىدۇ.
مۇسابىقىنىڭ ئىككىنچى باسقۇچى 19-مايدا، ئۈچىنچى باسقۇچى 30-ئاۋغۇستتا، ھەل قىلغۇچ باسقۇچى بولغان «جۇمھۇرىيەت لوڭقىسى» بولسا 29-ئۆكتەبىردە ئىستانبۇل بوغۇزىدا ئۆتكۈزۈلىدۇ.
