كامبودژالىق بىر ئەمەلدارنىڭ بىلدۈرۈشىچە، شەرقىي جەنۇبىي ئاسىيادىكى بۇ ئىككى دۆلەت ئوتتۇرىسىدا قايتىدىن ئەۋج ئالغان زوراۋانلىقنىڭ ئىككىنچى كۈنىدە، تايلاند بىلەن بولغان چېگرا توقۇنۇشىدا كەم دېگەندە بىر كامبودژا پۇقراسى ھاياتىدىن ئايرىلغان، يەنە بەش كىشى يارىلانغان.
ئوددار مېئانچېي ئۆلكىلىك ھۆكۈمەت باياناتچىسى مېت مىس فېكدېي، توقۇنۇشنىڭ چېگرا ماجىراسى داۋاملىشىۋاتقان بانتېي ئامپىل رايونىدا يۈز بەرگەنلىكىنى قەيت قىلدى. فېكدېي ئۆزىنىڭ فېيسبۇكتىكى ئادرېسىدا ئۇچۇر ھەمبەھرىلەپ، 1500 گە يېقىن كامبودژالىق ئائىلىنىڭ بىخەتەر رايونلارغا كۆچۈرۈلگەنلىكىنى ئۇقتۇردى.
يەنە بىر تەرەپتىن، تايلاند سەھىيە مىنىستىرلىقى جۈمە كۈنى ئەتىگەندە، كامبودژا بىلەن بولغان توقۇنۇشتا 15 تايلاند پۇقراسىنىڭ قازا قىلغانلىقىنى ئېلان قىلدى.
جىددىيچىلىك كەڭ كۆلەملىك توقۇنۇشقا ئايلاندى
تايلاند بىلەن كامبودژا ئوتتۇرىسىدىكى جىددىيچىلىك، ماي ئېيىدا ئىككى دۆلەت ئەسكەرلىرىنىڭ چېگرا ماجىراسى داۋاملىشىۋاتقان كىچىك بىر رايوندا توقۇنۇشۇشى نەتىجىسىدە قايتىدىن كەسكىنلەشكەن ئىدى. بۇ ۋەقەدە بىر كامبودژا ئەسكىرى ھاياتىدىن ئايرىلغان. تەرەپلەر بىر-بىرىنى ئەيىبلىگەن ۋە ھەر ئىككى دۆلەت ئۆزىنى قوغداش ھوقۇقىدىن پايدىلانغانلىقىنى ئىلگىرى سۈرگەنىدى.
گەرچە ئىككى دۆلەت ھۆكۈمىتى كېيىنچە جىددىيچىلىكنى پەسەيتىش توغرىسىدا كېلىشىم ھاسىل قىلغان بولسىمۇ، ھەربىي ھەرىكەتتىن باشقا جاۋاب قايتۇرۇش تەدبىرلىرىنى قوللىنىش تەھدىتلىرىنى داۋاملاشتۇرۇپ، ۋەزىيەتنىڭ جىددىيلىكىنى ساقلاپ كەلگەنىدى.
تايلاند ھۆكۈمىتى چېگرا لىنىيەسى بويىچە تېخىمۇ قاتتىق چەكلىمىلەرنى يولغا قويۇپ، ئوقۇغۇچىلار، بىمارلار ۋە زۆرۈر ئېھتىياجلىق كىشىلەردىن باشقىلارنىڭ چېگرادىن ئۆتۈشىنى پۈتۈنلەي دېگۈدەك توختىتىۋەتكەن. تايلاند دائىرىلىرى پەيشەنبە كۈنى چېگرانىڭ تولۇق تاقالغانلىقىنى جاكارلىغانىدى.
بۇنىڭغا قارىتا كامبودژا ھۆكۈمىتىمۇ جاۋاب قايتۇرۇپ، تايلاندنىڭ كىنو ۋە تېلېۋىزىيە پىروگراممىلىرىنى تارقىتىشنى چەكلىدى؛ تايلاندتىن يېقىلغۇ، مېۋە-چېۋە ۋە كۆكتات ئىمپورت قىلىشنى توختاتتى؛ شۇنداقلا بىر قىسىم خەلقئارالىق ئىنتېرنېت لىنىيەلىرى بىلەن تايلاندتىن كېلىدىغان ئېنېرگىيە تەمىناتىنى ئۈزۈپ قويدى.
