قىرغىزىستاننىڭ چولپان-ئاتا شەھىرىدە ياۋرو-ئاسىيا ئىقتىسادىي ئىتتىپاقىغا (AEB) ئەزا دۆلەتلەر ھۆكۈمەت باشلىقلىرىنىڭ ئىشتىراك قىلىشى بىلەن، ياۋرو-ئاسىيا ھۆكۈمەتلەر ئارا كېڭىشىنىڭ يىغىنى ئۆتكۈزۈلدى.

قىرغىزىستان مىنىستىرلار كابىنېتىنىڭ مەسئۇلى ئادىلبېك قاسىمئالىيېۋنىڭ ساھىبخانلىقىدا ئۆتكۈزۈلگەن بۇ يىغىنغا؛ رۇسىيە باش مىنىستىرى مىخايىل مىشۇستىن، قازاقىستان باش مىنىستىرى ئولژاس بېكتېنوۋ، بېلارۇسىيە باش مىنىستىرى ئالېكساندىر تۇرچىن، ئەرمېنىيە باش مىنىستىرى نىكول پاشىنيان، ئۆزبېكىستان باش مىنىستىرى ئابدۇللا ئارىپوۋ، ئىران سانائەت، كانچىلىق ۋە سودا مىنىستىرى سەييىد مۇھەممەد ئاتاباك ۋە كۇبانىڭ موسكۋادا تۇرۇشلۇق باش ئەلچىسى گونزالېز ئېنرىكې ئورتا قاتارلىقلار قاتناشتى.

قاسىمئالىيېۋ يىغىندىكى نۇتقىدا، دۇنيا مىقياسىدا ئۆرلەۋاتقان يېمەكلىك باھاسىنىڭ جەمئىيەتتە جىددىيلىك پەيدا قىلىۋاتقانلىقى ھەققىدە ئاگاھلاندۇردى. ئۇ، ئىتتىپاقنىڭ ئورتاق پۇل-مۇئامىلە بازىرىنى ئۈنۈملۈك تەرەققىي قىلدۇرۇشنىڭ مۇھىملىقىنى تەكىتلەپ، بۇ بازارلارنىڭ تاۋار، مۇلازىمەت، كاپىتال ۋە ئەمگەك كۈچىنىڭ ئەركىن ئايلىنىشىغا ئاساس سېلىشى كېرەكلىكىنى كۆرسەتتى.

ئۇ يەنە مۇنداق دېدى: «ئورتاق پۇل-مۇئامىلە بازىرى ئەزا دۆلەتلەرگە رىقابەت ئەۋزەللىكى يارىتىپ بېرىش بىلەن بىرگە، ئىقتىسادىي ئېشىشقا يېڭى پۇرسەتلەرنى ئېلىپ كېلىدۇ. بىر ئەزا دۆلەتتىكى ۋاسىتىچى ئاپپاراتلار ۋە سودىگەرلەرنىڭ ئىتتىپاققا ئەزا باشقا دۆلەتلەرنىڭ پاي چېكى بازارلىرىغا كىرىشىگە يول ئاچىدىغان كېلىشىمنىڭ ئىمزالىنىشى بۇ ساھەدىكى مۇھىم قەدەمدۇر.»

ئىتتىپاقنىڭ نۆۋەتچى رەئىسى، قازاقىستان باش مىنىستىرى ئولژاس بېكتېنوۋ دۇنيا ئىقتىسادىدىكى ئېنىقسىزلىقلارغا ئىشارەت قىلىپ، بۇ يىل ياۋرو-ئاسىيا ئىقتىسادىي ئىتتىپاقى ئىچىدىكى ئومۇمىي سودا مىقدارىنىڭ %7.3 ئېشىپ، 102 مىليارد دوللارغا يېتىشىنىڭ مۆلچەرلىنىۋاتقانلىقىنى بىلدۈردى.

ئەرمېنىيە باش مىنىستىرى نىكول پاشىنيان ياۋرو-ئاسىيا ئىقتىسادىي ئىتتىپاقىغا ئەزا دۆلەتلەر بىلەن بولغان ھەمكارلىقنى كۈچەيتىشنىڭ ئەرمېنىيەنىڭ تاشقى سىياسەت ۋە ئىقتىسادىدىكى ئالدىنقى نىشانى بولىدىغانلىقىنى تەكىتلەپ، ئىتتىپاق ئىچىدىكى سىستېمىلىق توسالغۇلارنى چوقۇم تۈگىتىش كېرەكلىكىنى ئوتتۇرىغا قويدى.

رۇسىيە باش مىنىستىرى مىخايىل مىشۇستىن بولسا، ياۋرو-ئاسىيا ئىقتىسادىي ئىتتىپاقى دائىرىسىدە يېزا ئىگىلىك ساھەسىدە چەت ئەلگە تايىنىپ قېلىشنى ئازايتىش ۋە يەرلىك ئىشلەپچىقىرىشنى يەنىمۇ ئاشۇرۇش كېرەكلىكىنى تەكىتلىدى.

يىغىن ئاخىرىدا، كېڭەشنىڭ كېلەر نۆۋەتلىك يىغىنىنى 1- ۋە 2-ئۆكتەبىر كۈنلىرى بېلارۇسنىڭ پايتەختى مىنسك شەھىرىدە ئۆتكۈزۈش قارار قىلىندى.