دۈشەنبە كۈنى ئىران ئىسرائىلىيە ئىستىخبارات تەشكىلاتى - موسساد بىلەن ئالاقىسى بار دەپ قارالغان ئىككى كىشىنى ئۆلۈمگە ھۆكۈم قىلىپ ئىجرا قىلدى؛ بۇ، ئىسرائىلىيە ۋە ئامېرىكا قوشما ئىشتاتلىرى بىلەن ئۇرۇش پارتلىغاندىن بۇيانقى بىر قاتار ئۆلۈم جازالىرىنىڭ ئەڭ يېڭىسىدۇر.
ئەدلىيە ساھەسىگە تەۋە «مىزان ئونلاين» (Mizan Online) تور بېتىنىڭ خەۋەر قىلىشىچە، «مۇھەممەد مەسۇم شاھى ۋە ھامىد ۋەلىدىنىڭ ئۆلۈم جازاسى بۈگۈن سەھەردە ئىجرا قىلىنغان».
خەۋەردە كۆرسىتىلىشىچە، بۇ ئىككى شەخسنىڭ ھەر ئىككىلىسى «موسساد بىلەن ئالاقىسى بولغان جاسۇسلۇق تورىنىڭ ئەزالىرى» ئىكەن. ئۇلارنىڭ قاچان قولغا ئېلىنغانلىقى ھەققىدە توختالمىغان.
«مىزان» تور بېتىنىڭ بىلدۈرۈشىچە، بۇ ئىككى كىشى «مۇھارەبە» (ئاللاھقا قارشى ئۇرۇش ئېچىش مەنىسىدە) دەپ ئاتىلىدىغان ئۆلۈم جازاسى بېرىلىدىغان جىنايەت، شۇنداقلا «دۈشەن گۇرۇپپىلار ۋە زىيونىست رېجىم بىلەن ھەمكارلىشىش» جىنايىتى سادىر قىلىش بىلەن ئەيىبلەنگەن.
ئىران 28-فېۋرال ئامېرىكا ۋە ئىسرائىلىيە بىلەن ئۇرۇش باشلانغاندىن بۇيان، نۇرغۇن قېتىم ئۆلۈم جازاسى ئىجرا قىلدى. 8-ئاپرېلدىن باشلاپ بولسا ئىككى ھەپتىلىك ئاجىز بىر ئۇرۇش توختىتىش ھالىتى داۋاملاشماقتا.
چەت ئەلدىكى كىشىلىك ھوقۇق تەشكىلاتلىرىنىڭ مەلۇماتىغا ئاساسلانغاندا، ئىران خىتايدىن قالسىلا دۇنيادا ئەڭ كۆپ ئۆلۈم جازاسى ئىجرا قىلىدىغان ئىككىنچى دۆلەت ھېسابلىنىدىكەن.
