ئىسرائىلىيە ئارمىيەسى چارشەنبە كۈنى ئەتىگەن سائەت 04:34 ئەتراپىدا، غەززەگە قاراپ يولغا چىققان ئەركىنلىك فىلوتى بىرلەشمىسىگە تەۋە ئۈچ پاراخوتقا خەلقئارا سۇ تەۋەلىكىدە، غەززە دېڭىز قىرغىقىدىن تەخمىنەن 120 دېڭىز مىلى (222 كىلومېتىر) يىراقلىقتىكى بىر رايوندا ھۇجۇم قىلدى.
غەززە قامالىنى بۇزۇش خەلقئارا كومىتېتىنىڭ ئاممىۋى ئورتاقلىشىش تور بېتى X سەھىپىسىدە ئېلان قىلىنغان باياناتىدا مۇنداق دېيىلدى:
«<غەززە كۈن قۇشى>، <ئەلائە ئەننەججار> ۋە <ئەنەس ئەششەرىف> ئىسىملىك ئۈچ پاراخوتقا ئىسرائىلىيە ئارمىيەسى تەرىپىدىن غەززە دېڭىز قىرغىقىدىن 220 كىلومېتىر يىراقلىقتا ھۇجۇم قىلىنىپ، قانۇنسىز ھالدا توختىتىلدى.
فوتو سۈرەت ھەم ۋىدېيو كۆرۈنۈشلىرىدە، <كۈن قۇشى> پاراخوتىغا ھۇجۇم قىلىش پەيتلىرى ۋە بۇ جىنايەتنى يوشۇرۇش ئۈچۈن كامېراغا قورال بىلەن توسقۇنلۇق قىلىنغانلىقى كۆرسىتىلىدۇ.»
پاراخوتلار ھۇجۇمغا ئۇچرىدى، نەق مەيدان تارقىتىشلىرى ئۈزۈلۈپ قالدى
بىرلەشمىنىڭ يۇتۇب قانىلىدىكى نەق مەيدان پىروگراممىسىدا، ئىسرائىلىيە ئەسكەرلىرىنىڭ «غەززە كۈن قۇشى» پاراخوتىغا ھۇجۇم قىلغانلىقى كۆرسىتىلدى. ئىسرائىلىيەنىڭ 13-قانال تېلېۋىزىيەسى بۇنىڭدىن ئىلگىرى، ئىسرائىلىيە ئارمىيەسىنىڭ فىلوتقا ھۇجۇم قىلىشقا تەييارلىنىۋاتقانلىقىنى خەۋەر قىلغان ئىدى.
بىرلەشمىنىڭ كېيىنچە ئاممىۋى ئورتاقلىشىش تور بېتى Instagram سەھىپىسىدە ئېلان قىلىنغان باياناتىدا مۇنداق دېيىلدى:
«ئىسرائىلىيە غەززەدىن تەخمىنەن 120 دېڭىز مىلى يىراقلىقتا فىلوتىمىزغا ھۇجۇم قىلدى. كۆپ قىسىم نەق مەيداندىن تارقىتىشلار ئۈزۈلۈپ قالدى. ئىسرائىلىيە ئارمىيەسى ئۇلارنىڭ يولىنى ئۆزگەرتىشكە ئۇرۇندى. بۇ ھەقتە تېخىمۇ كۇپ ئۇچۇرلار كېلىدۇ.»
بىرلەشمىنىڭ رەسمىي ئىز قوغلاش سىستېمىسىمۇ چەكلىمىگە ئۇچرىدى.
بىرلەشمىنىڭ Instagram سەھىپىسىدە ئېلان قىلىنغان باياناتىدا يەنە مۇنداق دېيىلدى:
«ئىسرائىلىيە ئارمىيەسىنىڭ خەلقئارا سۇ تەۋەلىكىدە بۇنداق قىلىشقا قانۇنىي جەھەتتىن ھېچقانداق ھوقۇقى يوق. ئۇنىڭ ئۈستىگە، فىلوتىمىزنىڭ ھېچقانداق تەھدىت شەكىللەندۈرگىنىمۇ يوق.»
پاراخوتلار 110 مىڭ دوللارلىق تېببىي ياردەم ئېلىپ كېتىۋاتاتتى
پاراخوتلار غەززەدىكى ماتېرىيال قىسلىقىغا دۇچ كەلگەن دوختۇرخانىلارغا ئەۋەتىلىدىغان 110 مىڭ دوللاردىن ئارتۇق دورا، نەپەسلەندۈرۈش ئاپپاراتى ۋە ئوزۇقلۇق ماتېرىياللىرىنى ئېلىپ كېتىۋاتاتتى.
غەززەدىكى ئىسرائىلىيەنىڭ قانۇنسىز قامالىغا قارشى چىقىش ئۈچۈن غەززەگە ياردەم بېرىش فىلوتىنىڭ «بىن مادلېن» ناملىق پىروگراممىسىنىڭ بىر قىسمى بولغان توققۇز پاراخوتلۇق ئەترەتتە تەخمىنەن 100 ئادەم بار ئىدى.
2010-يىلى قۇرۇلغان خەلقئارا غەززەگە ياردەم بېرىش فىلوتى ئىسرائىلىيەنىڭ قامالى ئاستىدىكى غەززەگە ياردەم يەتكۈزۈشنى ۋە خەلقئارا جەمئىيەتنىڭ بۇ رايوندىكى ئىنسانىي كىرىزىسكە دىققىتىنى تارتىشنى مەقسەت قىلغان ئون نەچچە پائالىيەت ئۇيۇشتۇردى.
ئىسرائىلىيەنىڭ فىلوتلارغا قىلغان ھۇجۇملىرى يېڭىمۇ ئەمەس
ئالدىنقى ھەپتە ئىسرائىلىيە دېڭىز ئارمىيەسىنىڭ غەززەگە يۈرۈش قىلغان خەلقئارا سۇمۇد فىلوتىغا تەۋە 40 نەچچە پاراخوتقا ھۇجۇم قىلىپ، ئۇلارنى قولغا چۈشۈرۈپ، پاراخوتلاردىكى 450 دىن ئارتۇق پائالىيەتچىنى نەزەربەند قىلغاندىن كېيىن، ئاخىرقى ئەترەت يولغا چىقتى.
ئىشغالچى كۈچ بولغان ئىسرائىلىيە بۇنىڭدىن ئىلگىرى غەززەگە بارىدىغان پاراخوتلارغا ھۇجۇم قىلىپ، ئۇلارنىڭ يۈكلىرىنى قولغا چۈشۈرگەن ۋە پاراخوتلاردىكى پائالىيەتچىلەرنى چېگرادىن قوغلاپ چىقارغان ئىدى.
ئىسرائىلىيە تەخمىنەن 2 مىليون 400 مىڭ ئادەم ياشايدىغان غەززەنى ئۇدا 18 يىلدىن بۇيان قامال قىلىپ كەلگەن بولۇپ، بۇ يىل مارت ئېيىدا چېگرا ئېغىزلىرىنى تاقاپ، يېمەكلىك ۋە دورا ماتېرىياللىرى بىلەن تەمىنلەشنى توسۇپ، قامالنى تېخىمۇ كۈچەيتتى. بۇ ئەھۋال رايوننى ئاچارچىلىققا دۇچار قىلدى.
ئىسرائىلىيەنىڭ 2023-يىلى ئۆكتەبىردىن بۇيانقى بومباردىمانلىرى كۆپىنچىسى ئاياللار ۋە بالىلاردىن تەشكىل تاپقان 67 مىڭ 100 دىن ئارتۇق پەلەستىنلىكنىڭ غەززەدە ھاياتىدىن ئايرىلىشىغا سەۋەب بولدى ھەمدە رايوننى ياشاش مۇمكىن بولمايدىغان شەكىلدە ۋەيران قىلدى.
