ئۇكرائىنا پىرېزىدېنتى زېلېنسكىي ئاقساراي بىلەن كىيېۋ ئوتتۇرىسىدا پەقەت «بىرنەچچە ئىختىلاپلىق نۇقتا» نىڭ بارلىقىنى بىلدۈرۈپ، جەنۋە سۆھبەتلىرىنىڭ ئۇرۇشنى ئاخىرلاشتۇرۇش يولىدا تاشلىنىۋاتقان قەدەملەرنى ئازايتقانلىقىنى ئېيتتى.

ئۇكرائىنا پىرېزىدېنتى ۋولودىمىر زېلېنسكىي رۇسىيە - ئۇكرائىنا ئۇرۇشىنى ئاخىرلاشتۇرۇش مەقسىتىدە تۈزۈلگۈسى تىنچلىق پىلانىنىڭ ئەڭ سەزگۈر تەرەپلىرىنىڭ بىۋاسىتە ئامېرىكا پىرېزىدېنتى دونالد ترامپ بىلەن مۇزاكىرە قىلىنىدىغانلىقىنى ئېيتتى.

زېلېنسكىي ئاممىۋى ئورتاقلىشىش تور بېتى X سەھىپىسىدە ئېلان قىلغان ئۇچۇرىدا: «بۈگۈن ۋەكىللەر ئۆمىكىمىز ئامېرىكا تەرەپ ۋە ياۋروپالىق شېرىكلەر بىلەن ئۆتكۈزۈلگەن سۆھبەتلەردىن كېيىن جەنۋەدىن قايتتى. ئەمدى ئۇرۇشنى ئاخىرلاشتۇرۇش ئۈچۈن تاشلىنىدىغان مۇھىم قەدەملەرنىڭ تىزىملىكى تەييارلىنىشى مۇمكىن. ھازىر جەنۋەدىن كېيىن ماددىلار سانى تېخىمۇ ئاز ۋە بۇ دائىرىدە نۇرغۇنلىغان توغرا ئامىللار نەزەرگە ئېلىندى» دېگەن ئىبارىلەرنى ئىشلەتتى.

ھەرقانداق بىر پىلاننى مۇكەممەل تۈزۈش ئۈچۈن تېگىشلىك  خىزمەتلەرنى ئىشلەشكە توغرا كېلىدىغانلىقىنى ئېيتقان زېلېنسكىي: «ئەترىتىمىز يېڭى پىلان لايىھەلىرى ھەققىدە دوكلات بەردى ۋە بۇ ھەقىقەتەن توغرا بىر ئۇسۇلدۇر. سەزگۈر مەسىلىلەرنى پىرېزىدېنت ترامپ بىلەن مۇزاكىرە قىلىمەن» دېدى.

زېلېنسكىي يەنە بىر ئۇچۇرىدا، شېرىكلەر بىلەن ئېلىپ بېرىلغان «ئىجابىي خىزمەت» نىڭ يەنىلا مۇھىم ئىكەنلىكىنى ئېيتتى ۋە رۇسىيەنىڭ بېسىمنى داۋاملاشتۇرىدىغانلىقى ھەققىدە ئاگاھلاندۇرۇپ مۇنداق دېدى:

«رۇسىيەنىڭ ئۇكرائىناغا قىلىۋاتقان بېسىمىنى يېنىكلەتمەيدىغانلىقىنى بىلىشىمىز كېرەك. بۇ كۈنلەردە ۋە ھەپتىلەردە ھاۋا ھۇجۇمى ئاگاھلاندۇرۇشلىرىغا، شۇنداقلا بارلىق ھۇجۇم تەھدىتلىرىگە ئەستايىدىل مۇئامىلە قىلىش ناھايىتى زور ئەھمىيەتكە ئىگە. كىم بىلەن ئېلىشىۋاتقانلىقىمىزنى ئېنىق چۈشىنىمىز. باشقۇرۇلىدىغان بومبا بولماسلىقى، ئۇكرائىناغا ۋە خەلقىمىزگە قارىتىلغان كەڭ كۆلەملىك ھۇجۇملار بولماسلىقى كېرەك. بۇنى دۇنيادىكى ھەقىقەتەن كۈچلۈك بولغانلار كاپالەتكە ئىگە قىلالايدۇ. نۇرغۇن ئىش ئامېرىكاغا باغلىق. ئۇرۇشنى باشلىغان رۇسىيە بولدى، ئۇنى ئاخىرلاشتۇرۇشى كېرەك بولغىنىمۇ رۇسىيەدۇر. شېرىكلىرىمىز بىلەن دىيالوگ ئارقىلىق بۇنىڭ ئۈچۈن زۆرۈر شارائىتلارنى ھازىرلاۋاتىمىز.»

ئاقساراي ۋاشىنگتون بىلەن كىيېۋ ئوتتۇرىسىدىكى سۆھبەتلەرنىڭ داۋاملىق ئۈنۈملۈك بولۇۋاتقانلىقىنى ئەسكەرتىش بىلەن بىرگە، تەرەپلەر ئوتتۇرىسىدا بەزى مەسىلىلەردە تېخىچە پىكىر ئىختىلاپىنىڭ بارلىقىنى ئېتىراپ قىلدى.

ئامېرىكا ئاخبارات ۋاسىتىلىرى ئىشلىرى باياناتچىسى كارولىن لېۋىت «‹Fox News› تېلېۋىزىيە قانىلى» نىڭ  The Story» (ھېكايە) « پىروگراممىسىدا بەرگەن باياناتىدا، ئامېرىكا بىلەن ئۇكرائىنا ئوتتۇرىسىدا ھاسىل قىلىنىش ئېھتىماللىقى بولغان كېلىشىم مەسىلىسىدە پەقەت «بىرنەچچە ئىختىلاپلىق نۇقتا» نىڭ بارلىقىنى ئېيتتى.

لېۋىت ترامپنىڭ بىر كېلىشىم ھاسىل قىلىش مەسىلىسىدە ئۈمىدۋار ئىكەنلىكىنى بىلدۈردى.

ئۇ، جۇمھۇرىيەتچىلەر پارتىيەسىنىمۇ ئۆز ئىچىگە ئالغان تۈرلۈك ساھەلەردىن كەلگەن ترامپنىڭ رۇسىيەگە يان بېسىۋاتقانلىقى توغرىسىدىكى تەنقىدلەرنى رەت قىلدى.

لېۋىت مۇخبىرلارغا: «ئامېرىكا قوشما ئىشتاتلىرىنىڭ بۇ ئۇرۇشنى ئاخىرلاشتۇرۇش ئۈچۈن ھەر ئىككى تەرەپكە باراۋەر مۇئامىلە قىلمايۋاتقانلىقى توغرىسىدىكى قاراش پۈتۈنلەي خاتا» دېدى.

لېۋىت پىرېزىدېنتنىڭ ئىجرا قىلغىلى بولىدىغان بىر پىلاننىڭ ئاخىرى تۈزۈلىدىغانلىقىغا چىن دىلىدىن ئىشىنىدىغانلىقىنىمۇ سۆزلىرىگە ئىلاۋە قىلدى.