ئۇكرائىنانىڭ دۆلەتلىك جىددىي ئەھۋاللارغا تاقابىل تۇرۇش مەھكىمىسىنىڭ بىلدۈرۈشىچە، پەيشەنبە كۈنى ئەتىگەندە كىيېۋغا قىلىنغان «كەڭ كۆلەملىك» باشقۇرۇلىدىغان بومبا ھۇجۇمىدا كەم دېگەندە توققۇز ئادەم قازا قىلغان، 60 دىن ئارتۇق ئادەم يارىلانغان بولۇپ، بۇ ئۆتكەن ئۈچ يىللىق ئۇرۇش جەريانىدا پايتەختكە قىلىنغان ئەڭ قانلىق ھۇجۇملارنىڭ بىرى ئىكەن.

ئۇكرائىنا دائىرىلىرى باشقۇرۇلىدىغان بومبا ھۇجۇمىدىن ئاگاھلاندۇرۇش بەردى، فىرانسىيە خەۋەر ئاگېنتلىقى مۇخبىرلىرى پايتەختنىڭ ھەرقايسى جايلىرىدا پارتلاش ئاۋازلىرىنى ئاڭلىدى. ئۇكرائىنانىڭ دۆلەتلىك جىددىي ئەھۋاللارغا تاقابىل تۇرۇش مەھكىمىسى تېلېگرام بېتىدە قازا قىلغانلار سانىنى يېڭىلاپ: «رۇسىيە كىيېۋغا كەڭ كۆلەملىك ھۇجۇم قىلدى. دەسلەپكى مەلۇماتلارغا قارىغاندا، ھۇجۇملاردا 9 ئادەم قازا قىلغان، 63 ئادەم يارىلانغان» دېگەنلەرنى قەيت قىلدى. باياناتتا، دوختۇرخانىلاردا داۋالىنىۋاتقان 42 يارىدارنىڭ ئىچىدە ئىچىدە ئالتە بالىنىڭ بارلىقى ھەققىدىكى ئۇچۇرلارغىمۇ ئورۇن بېرىلدى.

باياناتتا، «پايتەختنىڭ بەش رايونى زىيانغا ئۇچرىدى؛ ماشىنا ئىسكىلاتلىرى ۋە مەمۇرىي بىنالاردىكى ئوت ئۆچۈرۈلدى. دۆلەتلىك جىددىي ئەھۋاللارغا تاقابىل تۇرۇش مەھكىمىسى، ھۇجۇمدا ئاھالىلەر ئولتۇراق ئۆيلىرىنىڭمۇ زىيانغا ئۇچرىغانلىقىنى بىلدۈردى. «ۋەيرانىلەر ئاستىدا قالغان كىشىلەرنى ئىزدەش خىزمىتى داۋاملاشماقتا» دېيىلدى.

فىرانسىيە خەۋەر ئاگېنتلىقى مۇخبىرىنىڭ خەۋەر قىلىشىچە، ھاۋا ھۇجۇمى باشلانغاندا نەچچە ئونلارچە كىشى كۆپ قەۋەتلىك بىنانىڭ يەر ئاستى ئۆيىگە كىرىۋالغان. كىيېۋ ئەڭ ئاخىرقى قېتىم ئاپرېلنىڭ بېشىدا باشقۇرۇلىدىغان بومبا ھۇجۇمىغا ئۇچراپ، كەم دېگەندە ئۈچ ئادەم يارىلانغان ئىدى. 2022-يىلى فېۋرالدا رۇسىيە ئومۇميۈزلۈك ھۇجۇم قىلىشنى باشلىغاندىن بۇيان، كىيېۋ ئارىلاپ-ئارىلاپ ھۇجۇمغا ئۇچراپ كەلدى.

شەھەر باشلىقى ئىگور تېرېخوۋنىڭ بىلدۈرۈشىچە، ئۇكرائىنانىڭ شەرقىگە جايلاشقان خاركىۋ شەھىرى پەيشەنبە كۈنى ئەتىگەندە يەتتە باشقۇرۇلىدىغان بومبا بىلەن ھۇجۇمغا ئۇچرىغان. ئۇ بايانات ئېلان قىلىپ: «شەھەر بىر كېچىدىلا ئىككىنچى قېتىم قاناتلىق باشقۇرۇلىدىغان بومبا ھۇجۇمىغا ئۇچرىدى» دېدى

ئۇ يەنە: «ئەڭ يېقىنقى ھۇجۇملارنىڭ بىرى نوپۇسى زىچ ئاھالىلەر رايونىغا قىلىندى... ئۇ يەردە ئىككى ئادەم يارىلاندى. دۈشمەن ھۇجۇمىنىڭ ئاقىۋەتلىرىنى تەكشۈرۈش خىزمىتى داۋاملاشماقتا» دېدى ۋە سۆزىنى داۋاملاشتۇرۇپ، شەھەر ئاھالىسىنى «ھوشيار بولۇش»قا چاقىردى.

ئۇكرائىنا پىرېزىدېنتى ۋولودىيمىر زېلېنىسكىينىڭ باش مەسلىھەتچىسى ئاندرېي يېرماك رۇسىيەنىڭ كىيېۋ، خاركىۋ ۋە باشقا شەھەرلەرگە «باشقۇرۇلىدىغان بومبا ۋە ئۇچقۇلار بىلەن ھۇجۇم قىلىۋاتقانلىقىنى» بىلدۈرۈپ: «پۇتىننىڭ مەقسىتى پەقەت ئۆلتۈرۈشلا... بىگۇناھ پۇقرالارغا قىلىنغان ھۇجۇملار توختىتىلىشى كېرەك» دېگەنلەرنى قەيت قىلدى.