شىمالىي كورېيە ھۆكۈمىتى، «يول قويۇلمايدىغان بىر يادرو ئورنى» غا ئىگە ئىكەنلىكىنى ۋە بۇ ئورۇننىڭ «ھېچقانداق شارائىتتا كەينىگە ياندۇرۇلمايدىغانلىقىنى» بىلدۈردى.

شىمالىي كورېيە مۇئاۋىن تاشقى ئىشلار مىنىستىرى كىم سۇنگيوڭ ئامېرىكانىڭ نيۇ-يورك شەھىرىدە ئۆتكۈزۈلگەن بىرلەشكەن دۆلەتلەر تەشكىلاتى 81-نۆۋەتلىك ئومۇمىي كېڭىشىدە سۆز قىلدى.

خەلقئارا مۇناسىۋەتلەردە كۆپ قۇتۇپلۇقنىڭ «دەۋرنىڭ قارشى تۇرغىلى بولمايدىغان بىر يۈزلىنىشى» ئىكەنلىكىنى تەكىتلىگەن كىم: «يەككە بىر ئەزا دۆلەتنىڭ ئىرادىسىنى دۇنيانىڭ قالغان قىسمىغا ئۆز بېشىمچىلىق بىلان ھالدا تاڭىدىغان ۋە خەلقئارا سىياسەت سەھنىسىگە ھۆكۈمرانلىق قىلىدىغان كۈنلەر ئارقىدا قالدى» دېدى.

كىم شىمالىي كورېيەنىڭ «يول قويۇلمايدىغان بىر يادرو ئورنى» غا ئىگە ئىكەنلىكىنى ۋە بۇ ئورۇننىڭ «ھېچقانداق شارائىتتا كەينىگە ياندۇرۇلمايدىغانلىقىنى» ئىلگىرى سۈردى.

ياپونىيەگە «قوراللىنىش» نارازىلىقى

توكيو ھۆكۈمىتىنىڭ «قارشى ھۇجۇم سىغىمى» نامى ئاستىدا، قوشنا دۆلەتلەرگە قارشى ئۇزۇن مۇساپىلىك ھۇجۇم قوراللىرىنى تەرەققىي قىلدۇرۇش ۋە تەمىنلەشنى ئۆز ئىچىگە ئالغان بەزى قەدەملەرنى تاشلىغانلىقىنى ئىلگىرى سۈرگەن كىم: «بۇ خىل ھەرىكەتلەر پۈتكۈل رايون ئۈستىدە ئۇرۇش بۇلۇتلىرىنىڭ ئايلىنىپ يۈرۈشىگە سەۋەب بولماقتا» دېدى.

ياپونىيەنىڭ قايتىدىن قوراللىنىش ئۇرۇنۇشلىرى سايىسىدا، نۆۋەتتىكى مۇقىمسىز خەلقئارا مۇھىتتىن پايدىلانغانلىقىنى قەيت قىلغان كىم، ئامېرىكا، ياپونىيە ۋە جەنۇبىي كورېيەنىڭ رايوندا يېقىنقى مەزگىلدە ئۆتكۈزگەن ئورتاق مانېۋىرلىرىنى ئەيىبلىدى.

«ئامېرىكا-ياپونىيە-جەنۇبىي كورېيە ھەربىي ئىتتىپاقى تېخىمۇ تاجاۋۇزچى بىر ھەربىي گۇرۇھقا ئايلاندۇرۇلماقتا» دېگەن كىم، ئامېرىكا ۋە ئىسرائىلىيەنىڭ ئىرانغا قارشى بۇ يىل قىلغان ھۇجۇملىرىنىمۇ «دۆلەت قوللىغان تېررورىزم» دەپ تەرىپلىدى.