مالايسىيانىڭ ئاراكانلىق مۇسۇلمانلارنى ئۆز ئىچىگە ئالغان 1476 بىرما پۇقراسىنىڭ دۆلەتلىرىگە قايتۇرۇلۇش مۇساپىسىنىڭ دەسلەپكى باسقۇچىنى باشلىغانلىقى بىلدۈرۈلدى.
كۇئالالۇمپۇر ھۆكۈمىتى باشلىغان قايتۇرۇش پىروگراممىسى دائىرىسىدە، 1476 كىشى ئولتۇرغان ئاپتوبۇسلار، خەۋپسىزلىك ئاپتوموبىللىرىنىڭ ھەمراھلىقىدا مالايسىيانىڭ غەربىي شىمالىدىكى لۇمۇت دېڭىز ئارمىيە بازىسى يېنىدىكى مەجلىس پېربانداران مانجۇڭ تەنتەربىيە مەيدانىغا يېتىپ باردى.
يۆتكەش خىزمەتلىرىنىڭ تاماملىنىشىنىڭ ئارقىسىدىن بۇ كىشىلەرنىڭ، دېڭىز ئارمىيە بازىسىغا ئېلىپ بېرىلىشى ۋە بازىغا ئەۋەتىلگەن بىرما دېڭىز ئارمىيەسىگە ئائىت كېمىلەرگە يۆتكىلىشى پىلانلانماقتا.
مالايسىيا مەتبۇئاتلىرىدا ئورۇن ئالغان خەۋەرلەردە، تەخمىنەن 5 مىڭ كىشىنىڭ قايتىشى نىشان قىلىنغان قايتۇرۇش پىروگراممىسىنىڭ «ئۆز ئىختىيارلىقى ئاساسىغا تايىنىدىغانلىقى» ۋە بىرما ھۆكۈمىتى بىلەن «كېلىشىم ئاساسىدا» ھەرىكەت قىلىنغانلىقى بىلدۈرۈلدى.
بىرمادا ئاراكانلىق مۇسۇلمانلارغا ئىرقىي تازىلاش
بىرمانىڭ ئاراكان ئۆلكىسىدە 2012-يىلى بۇددىستلار بىلەن مۇسۇلمانلار ئوتتۇرىسىدا توقۇنۇشلار چىققان، ۋەقەلەردە كۆپىنچىسى مۇسۇلمانلاردىن تەركىب تاپقان مىڭلىغان كىشى قىرغىن قىلىنغان، يۈزلەرچە ئۆي ۋە دۇكانلارغا ئوت قويۇپ بېرىلگەن ئىدى.
ئاراكاندىكى چېگرا تەكشۈرۈش پونكىتلىرىغا 2017-يىلى 25-ئاۋغۇستتا قىلىنغان تەڭ قەدەملىك ھۇجۇملارنى باھانە قىلغان بىرما ئارمىيەسى ۋە بۇددىست مىللەتچىلەر، ئاممىۋى زوراۋانلىق ھەرىكەتلىرىنى باشلىغان ئىدى. بىرلەشكەن دۆلەتلەر تەشكىلاتىنىڭ مەلۇماتىغا قارىغاندا، 2017-يىلى ئاۋغۇستتىن كېيىن ئاراكاندىكى بېسىم ۋە زۇلۇمدىن قېچىپ باڭلادېشقا پاناھلانغانلارنىڭ سانى 900 مىڭدىن ئاشقان.
خەلقئارالىق كىشىلىك ھوقۇق تەشكىلاتلىرى، ئېلان قىلغان سۈنئىي ھەمراھ كۆرۈنۈشلىرى ئارقىلىق يۈزلەرچە يېزىنىڭ يوق قىلىنغانلىقىنى ئىسپاتلىغان ئىدى.
ب د ت ۋە خەلقئارالىق كىشىلىك ھوقۇق تەشكىلاتلىرى، ئاراكانلىق مۇسۇلمانلارغا قارىتىلغان زوراۋانلىقنى «ئىرقىي تازىلاش» ياكى «ئىرقىي قىرغىنچىلىق» دەپ ئاتىماقتا.
