«يۇنخاپ» خەۋەر ئاگېنتلىقىنىڭ جەنۇبىي كورېيە تاشقى ئىشلار مىنىستىرلىقىنىڭ باياناتىنى نەقىل كەلتۈرۈشىچە، جەنۇبىي كورېيە بىلەن ناتو تور بىخەتەرلىكى ھەمكارلىقىنى تەرەققىي قىلدۇرۇش مەقسىتىدە يۇقىرى دەرىجىلىك سۆھبەت ئۆتكۈزگەن.

پەيشەنبە كۈنى سېئۇلدا ئۆتكۈزۈلگەن تور بىخەتەرلىكى سۆھبىتىگە جەنۇبىي كورېيەنىڭ خەلقئارا تور مۇناسىۋەتلىرى باش ئەلچىسى لى تائې ۋۇ بىلەن ناتونىڭ يېڭىلىق يارىتىش، ئارىلاشما ۋە تور بىخەتەرلىكىگە مەسئۇل مۇئاۋىن باش كاتىپى ژان-چارلىز ئېللېرمان-كىنگومبې رىياسەتچىلىك قىلغان.

تەرەپلەر، تور تەھدىتلىرىگە قارشى تۇرۇشتا ھەمكارلىقنى كۈچەيتىش، ھىندى-تىنچ ئوكيان ۋە ياۋروپا-ئاتلانتىك ئوكيان رايونلىرىدىكى تور بىخەتەرلىكى خەۋپ-خەتىرىنى مۇھاكىمە قىلىش توغرىسىدا ئورتاق تونۇش ھاسىل قىلدى.

جەنۇبىي كورېيە بىلەن ناتو تور بىخەتەرلىكى ساھەسىدىكى ھەمكارلىقنى كۈچەيتىش مەقسىتىدە، 2023-يىلى يۇقىرى دەرىجىلىك تور بىخەتەرلىكى دىيالوگىنى يولغا قويغان ئىدى.

بۇ ئىش جەنۇبىي كورېيە دۆلەت مۇداپىئە مىنىستىرى ئان گيۇ-بەك بىلەن ناتو ھەربىي ئىشلار كومىتېتىنىڭ باشلىقى جۇسېپپې كاۋو دراگونېنىڭ سەيشەنبە كۈنى سېئۇل مۇداپىئە دىيالوگى جەريانىدا، دۆلەت مۇداپىئەسى ۋە مۇداپىئە سانائىتى ھەمكارلىقىنى كۈچەيتىش يوللىرىنى مۇزاكىرە قىلغاندىن كېيىن يۈز بەردى.

جەنۇبىي كورېيە دۆلەت مۇداپىئە مىنىستىرلىقىنىڭ باياناتىغا قارىغاندا، دراگونې جەنۇبىي كورېيە بىلەن ناتو ئوتتۇرىسىدا «دۆلەت مۇداپىئەسى ۋە ھەربىي ئالماشتۇرۇش، ئۇچۇر ھەمبەھرىلەش، تور بوشلۇقى، ئالەم قاتنىشى ۋە سۈنئىي ئەقىل قاتارلىق ھەر قايسى ساھەلەردە چوڭقۇرلىشىدىغان ۋە كېڭىيىدىغان» كونكرېت ھەمكارلىقلار توغرىسىدا كېلىشىم ھاسىل قىلغان.