ئون دۆلەتنىڭ تاشقى ئىشلار مىنىستىرلىرى ئېلان قىلغان بىرلەشمە باياناتتا، لىۋاندىكى ۋەزىيەتتىن ئەنسىرەۋاتقانلىقلىرىنى، توقۇنۇشلارغا دەرھال خاتىمە بېرىلىشىنى ۋە سىياسىي دىيالوگقا قايتىشنى تەلەپ قىلىپ مۇنداق دېدى:
«لىۋاننىڭ رايونلۇق جىددىيچىلىكنى پەسەيتىش تىرىشچانلىقلىرىغا داخىل قىلىنىشىنى ۋە بارلىق تەرەپلەرنىڭ ئۇزۇن مۇددەتلىك سىياسىي ھەل قىلىش چارىسى تېپىش ئۈچۈن تىرىشىشىنى ئۈمىد قىلىمىز.»
مىنىستىرلار يەنە لىۋاندىكى ئۇرۇشنىڭ داۋاملىشىشىنىڭ، «بارلىق تەرەپلەر تەرىپىدىن تولۇق ھۆرمەت قىلىنىشى كېرەك بولغان» نۆۋەتتىكى رايونلۇق جىددىيچىلىكنى پەسەيتىش تىرىشچانلىقلىرىنى خەۋپكە دۇچار قىلىۋاتقانلىقى ھەققىدە ئاگاھلاندۇرۇش بەردى. شۇنداقلا، ئىسرائىلىيە بىلەن بىۋاسىتە سۆھبەت ئۆتكۈزۈش تەشەببۇسىنى ۋە ئىسرائىلىيەنىڭ ئامېرىكا مۇرەسسەچىلىك قىلغان مۇزاكىرەلەرنى باشلاشنى قوبۇل قىلغانلىقىنى قارشى ئالىدىغانلىقىنى بىلدۈردى.
باياناتتا: «ھەر ئىككى تەرەپنى بۇ پۇرسەتتىن پايدىلىنىشقا چاقىرىمىز» دېيىلدى ۋە بىۋاسىتە مۇزاكىرەلەرنىڭ لىۋان، ئىسرائىلىيە ۋە رايوننىڭ بىخەتەرلىكىگە كاپالەتلىك قىلىشقا ياردىمى بولىدىغانلىقى تەكىتلەندى.
مىنىستىرلار بارلىق تەرەپلەرنى «دەرھال جىددىيچىلىكنى پەسەيتىشكە ۋە ئامېرىكا بىلەن ئىران ئوتتۇرىسىدىكى ئۇرۇش توختىتىش كېلىشىمى ياراتقان پۇرسەتتىن پايدىلىنىشقا» چاقىردى. شۇنداقلا، لىۋان دائىرىلىرىنىڭ مەلۇماتلىرىغا ئاساسلىنىپ، ئىسرائىلىيەنىڭ 8-ئاپرېلدا لىۋانغا قىلغان ۋە 350 تىن ئارتۇق كىشىنىڭ ئۆلۈشى، 1000 دىن ئارتۇق كىشىنىڭ يارىلىنىشى بىلەن نەتىجىلەنگەن ھۇجۇملىرىنى ئەيىبلىدى.
باياناتتا: «پۇقرالار ۋە پۇقراۋى ئۇل ئەسلىھەلەر خەلقئارا ئىنسانىي قانۇنلارغا ئاساسەن قوغدىلىشى كېرەك» دېيىلدى.
بىرلەشكەن دۆلەتلەر تەشكىلاتى تىنچلىقنى ساقلاش قىسمىغا قىلىنغان ھۇجۇملارمۇ ئەيىبلەنگەن باياناتتا، بىرلەشكەن دۆلەتلەر تەشكىلاتى تىنچلىقنى ساقلاش قىسمىنىڭ بىخەتەرلىكىنىڭ ھەر ۋاقىت كاپالەتكە ئىگە قىلىنىشىنىڭ زۆرۈرلۈكى تەكىتلەندى.
مىنىستىرلار لىۋان خەلقى ۋە دائىرىلىرىنى قەتئىي قوللايدىغانلىقلىرىنى، ھەمدە لىۋاندىكى ئۆي-ماكانلىرىدىن ئايرىلىپ قالغان بىر مىليوندىن ئارتۇق كىشىگە جىددىي ياردەم بېرىشكە تەييار ئىكەنلىكلىرىنى بىلدۈردى.
باياناتتا، لىۋاننىڭ زېمىن پۈتۈنلۈكى ۋە ئىگىلىك ھوقۇقىغا ھۆرمەت قىلىشنىڭ مۇھىملىقى يەنە بىر قېتىم تەكىتلەندى، شۇنداقلا، بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ 1701-نومۇرلۇق قارارىنى تولۇق ئىجرا قىلىش چاقىرىقى ئوتتۇرىغا قويۇلدى.
باياناتتا يەنە لىۋان ھۆكۈمىتىنىڭ ھىزبۇللاھنىڭ ھەربىي پائالىيەتلىرىنى چەكلەش ۋە قورال ئىشلىتىش ھوقۇقىنى دۆلەتنىڭ كونتروللۇقىدا تۇتۇشنى ئۆز ئىچىگە ئالغان دۆلەت ھوقۇقىنى كۈچەيتىش قارارىغا يۇقىرى باھا بېرىلدى.
