فىنلاندىيە پىرېزىدېنتى ئالېكساندىر ستۇب: «تۈركىيە ھەققىدىمۇ ئەستايىدىل ئويلىنىشىمىز كېرەك. ھازىر ھېچكىم تۈركىيە تېمىسىنى تىلغا ئالمايدىغان بولۇپ قالدى. خەۋپسىزلىك نۇقتىسىدىن ئېلىپ ئېيتقاندا، تۈركىيەنىڭ ئىمكانىيەتنىڭ بارىچە يېقىن بولۇشى كېرەكلىكىنى چۈشىنىشىمىز ئىنتايىن مۇھىم» دېدى.
فىنلاندىيە پىرېزىدېنتى ئالېكساندىر ستۇب، 27 ئەزادىن تەشكىل تاپقان ياۋروپا ئىتتىپاقىنىڭ دائىرىسىنىڭ تېخىمۇ كېڭىيىشى، كانادانىمۇ ئۆز ئىچىگە ئالغان ئەزا دۆلەتلەر سانىنى 40 قا يەتكۈزۈش ئۈچۈن تىرىشچانلىق كۆرسىتىشى كېرەكلىكىنى بىلدۈردى.
فىنلاندىيەنىڭ پايتەختى ھېلسىنكىدا ئۆتكۈزۈلگەن يىغىندا سۆز قىلغان ستۇب، ياۋروپا ئىتتىپاقىنىڭ تېخىمۇ چوڭ نىشانلارنى كۆزلىشى كېرەكلىكىنى ئىلگىرى سۈردى.
ياۋروپا ئىتتىپاقىنىڭ دائىرىسىنىڭ كېڭىيىشىنى «ياۋروپانىڭ ئەڭ ياخشى سىياسىتى» دەپ تەسۋىرلىگەن ستۇب: «ياۋروپا ئىتتىپاقى ئەزا دۆلەتلەر سانىنى 40 قا يەتكۈزۈش ئۈچۈن تىرىشىشى، ئەنگلىيە، كانادا، تۈركىيە، نورۋېگىيە ۋە ئىسلاندىيەنى ئەزالىققا نامزاتلىققا كۆرسىتىشى كېرەك» دېدى.
ستۇب قاراتاغ بىلەن ئالبانىيەنىڭ «ئالدىنقى قاتاردىكى نامزات دۆلەتلەر» سۈپىتىدە كۆرسىتىلگەنلىكىنى ئەسكەرتىپ، 2020-يىلى ياۋروپا ئىتتىپاقىدىن ئايرىلغان ئەنگلىيەنىڭ ئىتتىپاققا قايتىدىن كىرىشىنىڭمۇ مۇھىملىقىنى تەكىتلىدى.
ئۇكرائىنا، مولدوۋا ۋە گىرۇزىيەنىڭمۇ ياۋروپا ئىتتىپاقىغا ئەزالىق مۇساپىسىدە ئىلگىرىلەشلەرنى قولغا كەلتۈرگەنلىكىنى تىلغا ئالغان ستۇب: «تۈركىيە ھەققىدىمۇ ئەستايىدىل ئويلىنىشىمىز كېرەك. ھازىر ھېچكىم تۈركىيە تېمىسىنى تىلغا ئالمايدىغان بولۇپ قالدى. خەۋپسىزلىك نۇقتىسىدىن ئېلىپ ئېيتقاندا، تۈركىيەنىڭ ئىمكانىيەتنىڭ بارىچە يېقىن بولۇشى كېرەكلىكىنى چۈشىنىشىمىز ئىنتايىن مۇھىم» دېدى.
