ئىسرائىلىيەنىڭ ئاخبارات ئورگىنى موساد ئۈچۈن جاسۇسلۇق قىلىش بىلەن ئەيىبلەنگەن ئىككى كىشى، مىللىي ئىستىخبارات تەشكىلاتى (MİT)، ئىستانبۇل جۇمھۇرىيەت باش تەپتىش مەھكىمىسى ۋە ئىستانبۇل ساقچى ئىدارىسىنىڭ بىرلەشمە ھەرىكىتىدە قولغا ئېلىندى.
دائىرىلەر، گۇماندارلاردىن بىرى سەركان چىچەك بولۇپ ئۇنىڭ بىۋاسىتە موساد ئۈچۈن ئىشلىگەنلىكى ئىلگىرى سۈرۈلگەنلىكىنى بىلدۈردى. ئادۋوكات توغرۇلخان دىپنىڭ بولسا تەشكىلات بىلەن ئالاقىسى بار رازۋېدچىكلارغا ئۇچۇر ساتقانلىقى ئوتتۇرىغا قويۇلدى.
تەپتىشلەر تەرىپىدىن سوراق قىلىنغاندىن كېيىن، ھەر ئىككى گۇماندار «سىياسىي ياكى ھەربىي جاسۇسلۇق مەقسىتىدە دۆلەتنىڭ مەخپىي ئۇچۇرلىرىغا ئېرىشىش» بىلەن ئەيىبلىنىپ، سوتقا ئۆتكۈزۈپ بېرىلدى ۋە تۇتۇپ تۇرۇشقا ھۆكۈم قىلىندى.
دائىرىلەر مۇھەممەت فاتىھ كەلەش دەپمۇ ئاتالغان چىچەكنىڭ خۇسۇسىي رازۋېدكا ئىدارىسىنى باشقۇرىدىغانلىقىنى ۋە موساد جاسۇسىنىڭ تەلىپىگە بىنائەن ئىستانبۇلدا بىر پەلەستىنلىك پائالىيەتچىنى كۆزەتكەنلىكىنى ۋە بۇ ۋەزىپە ئۈچۈن 4000 دوللار قىممىتىدىكى شىفىرلىق پۇل ئالغانلىقىنى بىلدۈردى.
دىپنىڭ بولسا ھۆكۈمەت ئارخىپلىرىدىن شەخسىي ئۇچۇرلارنى ئىقتىسادىي مەنپەئەت ئۈچۈن رازۋېدچىكلارغا تەمىنلىگەنلىكى ۋە چىچەك بىلەن باشقا جاسۇسلارنى قوللىغانلىقى قەيت قىلىندى. چىچەكنىڭ ئىلگىرى ئىسرائىلىيە ئۈچۈن جاسۇسلۇق قىلغانلىقى ئۈچۈن 19 يىللىق قاماق جازاسىغا ھۆكۈم قىلىنغان مۇسا كۇش بىلەن بىللە ئىشلىگەنلىكىمۇ ئاشكارىلاندى.
