جۇمھۇر رەئىس ئەردوغان پ ك ك تېررورچىلىرىنىڭ ئىراقنىڭ شىمالىدا قورال  تاشلاشنى باشلىشى بىلەن «47 يىللىق بالايىئاپەت» نىڭ ئاخىرلاشقانلىقىنى ئېلان قىلىپ، بۇنىڭ تېررورىزمىدىن خالىي تۈركىيە ۋە يېڭى مىللىي دەۋرگە قاراپ ئېلىنغان سىمۋوللۇق قەدەم ئىكەنلىكىنى تەكىتلىدى.

تۈركىيە جۇمھۇر رەئىسى رەجەپ تاييىپ ئەردوغان شىمالىي ئىراقتا پ ك ك تېررورچىلىرىنىڭ سىمۋوللۇق قورال تاشلىشىدىن كېيىن، تۈركىيەنىڭ تېررورىزمغا قارشى نەچچە ئون يىللىق كۈرىشىدە تارىخىي بۇرۇلۇش نۇقتىسى بولغانلىقىنى ئېلان قىلدى.

ئۇ شەنبە كۈنى (12-ئىيۇل): «بۈگۈن يېڭى بىر كۈن، تارىختا يېڭى بىر سەھىپە ئېچىلدى» دېدى ۋە «47 يىللىق تېررورىزم بالايىئاپىتى» نى ئاخىرلاشتۇرۇش يولىدىكى ھەل قىلغۇچ قەدەم دەپ ئاتىدى.

جۈمە كۈنى (11-ئىيۇل)، 30 نەپەر تېررورلۇق تەشكىلاتى پ ك ك ئەزاسى ئىراقنىڭ شىمالىدىكى بىر ئۆڭكۈرنىڭ ئاغزىدا قوراللىرىنى كۆيدۈردى. ئىنتايىن مۇھىم سىمۋوللۇق مەنىگە ئىگە بۇ ھەرىكەت، ئەنقەرە تەرىپىدىن تېررورلۇق تەشكىلاتىنىڭ تارقىلىشىنىڭ باشلىنىشى دەپ ئانالىز قىلىنماقتا.

مۇناسىۋەتلىك ئۇچۇرلارTRT Global - PKK terror weapons go up in smoke

بۇ ۋەقە، تېررورلۇق تەشكىلاتى پ ك ك نىڭ تۈركىيەگە قارشى ئۇزۇن مۇددەتلىك تېررورلۇق ھەرىكىتى باسقۇچلىرىدا، تەشكىلاتنىڭ ئەڭ مۇھىم سىمۋوللۇق قەدەملىرىدىن بىرى قارىلىدۇ. پ ك ك ئەنقەرە، ئامېرىكا ۋە ياۋروپا ئىتتىپاقى تەرىپىدىن تېررورلۇق تەشكىلاتى دەپ بېكىتىلگەن.

جۇمھۇر رەئىس رەجەپ تاييىپ ئەردوغان: «تۈنۈگۈندىن (11-ئىيۇل) باشلاپ، تېررورىزم بالايىئاپىتى ئاخىرلىشىش مۇساپىسىگە قەدەم قويدى. تۈركىيە ئازابلىق ۋە كۆز ياشلىق بىر باپنى يېپىشقا باشلىدى. بۈگۈن بۈيۈك، قۇدرەتلىك تۈركىيە ئەسىرىنىڭ دەرۋازىلىرى كەڭ ئېچىلدى» دېدى.

تېررورىزمىدىن خالىي تۈركىيە ئۈچۈن ئالغا ئىلگىرىلەش

بۇ پەيتنى ھەم مىللىي ياخشىلىنىش، ھەم ئىستراتېگىيەلىك غەلىبە دەپ تەسۋىرلىگەن جۇمھۇر رەئىس ئەردوغان، ھۆكۈمىتىنىڭ تېررورىزمىدىن خالىي تۈركىيە بەرپا قىلىش ۋەدىسىنى تەكرارلاپ، ئىتتىپاقلىق ۋە قانۇن ئىسلاھاتى بىلەن ئالغا ئىلگىرىلەشكە ۋەدە بەردى.

ئۇ: «بىز پارلامېنتىمىزدا بۇ مۇساپىنىڭ قانۇنىي تەلەپلىرىنى مۇزاكىرە قىلىش ئۈچۈن بىر كومىتېت قۇرىمىز. بىز بىرلىكتە، مۈرىنى-مۈرىگە تىرەپ خىزمەت قىلىمىز ۋە بارلىق توسالغۇلارنى يېڭىمىز» دېدى.

ئۇ بۇ مۇۋەپپەقىيەتنىڭ پەقەت ھۆكۈمەتكىلا ئەمەس، بەلكى پۈتكۈل تۈرك مىللىتىگە مەنسۇپ ئىكەنلىكىنى تەكىتلىدى.

ئۇ: «تۈركىيە غەلىبە قىلدى، مېنىڭ مىللىتىم غەلىبە قىلدى. تۈرك، كورد (كۈرت)، ئەرەب- 86 مىليون پۇقرايىمىز غەلىبە قىلدى» دېدى.

ئۇ سۆزىنى داۋاملاشتۇرۇپ: «بىز نېمە قىلساق، ئۇنى تۈركىيە ئۈچۈن، مىللىتىمىز ئۈچۈن، مۇستەقىللىقىمىز ئۈچۈن، كەلگۈسىمىز ئۈچۈن قىلىمىز» دېدى.

ئۇ يەنە، دۆلەتنىڭ ئىگىلىك ھوقۇقى مەسىلىسىدىكى قەتئىي پوزىتسىيەسىنى تەكىتلەپ مۇنداق دېدى:

 «بىز ھېچكىمنىڭ دۆلىتىمىزنىڭ شان-شەرىپىنى دەپسەندە قىلىشىغا يول قويمايمىز، بىز ھەرگىز باش ئەگمەيمىز. بىز ئىتتىپاقلىقىمىزغا، زېمىن پۈتۈنلۈكىمىزگە، خەلقىمىزگە ياكى تىنچلىقىمىزغا ۋە خاتىرجەملىكىمىزگە تەھدىت ئېلىپ كېلىدىغان ھەرقانداق ھەرىكەتكە قەتئىي رۇخسەت قىلمايمىز.»

ئۇ بۇ مىنۇتلارنى يېڭى بىر دەۋرنىڭ باشلىنىشى دەپ تەسۋىرلىدى ۋە: «بۈگۈن بۈيۈك ۋە قۇدرەتلىك تۈركىيەنىڭ تاڭ شەپىقى يورۇماقتا. بىز تېررورىزمىدىن خالىي تۈركىيە قۇرۇش پىروگراممىمىزنى مۇشۇ چۈشەنچە بىلەن ئىجرا قىلىۋاتىمىز. تۈركىيە ئەسىرىنىڭ دەرۋازىلىرى كەڭ ئېچىلدى» دېدى.

مۇناسىۋەتلىك ئۇچۇرلارTRT Global - UN welcomes PKK terrorist group disarmament process