ياۋروپا كېڭىشىنىڭ باشلىقى ئانتونىيو كوستا بىرلەشكەن دۆلەتلەر تەشكىلاتى ئومۇمىي كېڭىشىنىڭ ئىككى دۆلەتلىك ھەل قىلىش چارىسى يىغىنى دائىرىسىدە جۇمھۇر رەئىس رەجەپ تاييىپ ئەردوغان بىلەن ئۆتكۈزگەن سۆھبىتىدە، تۈركىيەنىڭ رۇسىيە بىلەن بولغان ئۇرۇشتا ئۇكرائىناغا قىلغان ياردىمىگە يۇقىرى باھا بەردى.

كوستا دۈشەنبە كۈنى بەرگەن باياناتىدا، سۆھبەتنىڭ «ئىجابىي» ئۆتكەنلىكىنى بىلدۈرۈپ: «تۈركىيە ‹پىدائىيلار ئىتتىپاقى›نىڭ تىرىشچانلىقلىرىغا قاتنىشىش ئارقىلىق ئۇكرائىنانى قوللاشتىكى مۇھىم بىر ھەمراھ» دېدى.

كوستا يەنە ياۋروپا ئىتتىپاقىنىڭ «ئادىل ۋە مەڭگۈلۈك تىنچلىق»نى ئىشقا ئاشۇرۇش ئۈچۈن بىرلىكتە خىزمەت قىلىشنى داۋاملاشتۇرىدىغانلىقىنى تەكىتلىدى.

مەڭگۈلۈك تىنچلىق ئۈچۈن ھەر قايسى ساھەلەردە رەھبەرلىك قىلىشقا تەييارمىز

4-سېنتەبىر پارىژدا ئۆتكۈزۈلگەن ئەڭ يېڭى «پىدائىيلار ئىتتىپاقى» يىغىنى، رۇسىيە بىلەن داۋاملىشىۋاتقان ئۇرۇشتا ئۇكرائىناغا قارىتىلغان يېڭى بىخەتەرلىك ۋەدىلىرى بىلەن دىققەتنى تارتتى.

ئۇرۇش باشلانغاندىن بېرى موسكۋا بىلەن كىيېۋ ئارىسىدا تەڭپۇڭلاشتۇرغۇچى رول ئويناشقا تىرىشىۋاتقان تۈركىيە، يىغىندا تىنچلىق ئۈچۈن تىرىشچانلىق كۆرسىتىشتىكى قەتئىي ئىرادىسىنى قايتا تەكىتلىدى.

پارىژ ئالىي دەرىجىلىكلەر يىغىنىدىن كېيىن بايانات ئېلان قىلغان مۇئاۋىن جۇمھۇر رەئىس جەۋدەت يىلماز، ئەنقەرەنىڭ رۇسىيە-ئۇكرائىنا ئۇرۇشىدا «مەڭگۈلۈك تىنچلىقنى ئورنىتىش ئۈچۈن ھەر قايسى ساھەلەردە باشلامچى رول ئويناشقا تەييار» ئىكەنلىكىنى بىلدۈردى.

ئەنقەرە ئىلگىرى رۇسىيەلىك ۋە ئۇكرائىنالىق ئەمەلدارلار ئارىسىدا بىۋاسىتە سۆھبەتلەرنى ئۆتكۈزگەن ھەمدە 2022-يىلى توقۇنۇش پارتلىغاندىن بۇيان قولغا كەلتۈرۈلگەن ساناقلىق دىپلوماتىك بۆسۈشلەرنىڭ بىرى دەپ قارالغان قارا دېڭىز ئاشلىق كېلىشىمىگە ۋاسىتىچىلىق قىلغانىدى.