بىرلەشمە خەۋەر ئاگېنتلىقى (AP) نىڭ رەسمىي بولمىغان نەتىجىلىرىگە ئاساسلانغاندا، ئامېرىكا كېڭەش پالاتاسىدىكى ئورۇن تەقسىماتى ئاساسەن ئايدىڭلاشقان.

بۇ نەتىجىلەرگە قارىغاندا، دېموكراتلار 51 ئورۇنغا ئېرىشىپ، دۆلەت مەجلىسىنىڭ يۇقىرى پالاتاسى ھېسابلانغان كېڭەش پالاتاسىنىڭ كۆپ سانلىق كونتروللۇقىنى جۇمھۇرىيەتچىلەردىن تارتىپ ئالغان.

دېموكراتلار شىمالىي كارولىنا، جەنۇبىي كارولىنا، تېكساس، ئوخايو، كانزاس ۋە ئىئوۋا قاتارلىق ئىشتاتلاردىكى كېڭەش پالاتاسى ئورۇنلىرىنى جۇمھۇرىيەتچىلەردىن تارتىۋېلىپ، ناھايىتى مۇھىم بىر ئۇتۇققا ئېرىشكەن.

بۇ ئارقىلىق، 100 ئورۇنلۇق كېڭەش پالاتاسىدا كۆپ سانلىقنى ئىگىلىگەن دېموكراتلار، جۇمھۇرىيەتچىلەر پارتىيەسىدىن بولغان پىرېزىدېنت دونالد ترامپقا قارشى قانۇن چىقىرىش ھوقۇقىنى كونترول قىلىشتا يەنە بىر قېتىم مۇھىم ئۈستۈنلۈكنى قولغا كەلتۈردى.

بىرلەشمە خەۋەر ئاگېنتلىقىنىڭ رەسمىي بولمىغان نەتىجىلىرىگە قارىغاندا، ئاۋام پالاتاسى سايلىمىدا ھازىرغىچە دېموكراتلار 173، جۇمھۇرىيەتچىلەر 106 ئورۇنغا ئېرىشكەن. جۇمھۇرىيەتچىلەرنىڭ قولىدىكى 9 ئورۇنمۇ دېموكراتلارغا ئۆتۈپ كەتكەن.

مەلۇمكى، بىر پارتىيەنىڭ ئاۋام پالاتاسىدا كۆپ سانلىقنى ئىگىلىشى ئۈچۈن كەم دېگەندە 218 ئورۇنغا ئېرىشىشى شەرت.

ئامېرىكانىڭ ئوتتۇرا مەزگىللىك سايلىمى

ئامېرىكا خەلقى بۇ قېتىم ئىشتات باشلىقلىرى ۋە باشقا يەرلىك ۋەزىپىلەرگە، شۇنداقلا ئاۋام پالاتاسىدىكى جەمئىي 435 ئورۇننىڭ ھەممىسىگە ۋە كېڭەش پالاتاسىدىكى 100 ئورۇننىڭ 35 ىگە بېلەت تاشلىدى.

ئامېرىكا سايلام تۈزۈمىدە، 435 ئەزالىق ئاۋام پالاتاسىنىڭ بارلىق ئەزالىرى ھەر ئىككى يىلدا بىر قېتىم قايتا سايلىنىدۇ. بۇ سايلاملارنىڭ بىرى پىرېزىدېنت سايلىمى بىلەن بىر ۋاقىتتا ئېلىپ بېرىلسا، يەنە بىرى ئوتتۇرا مەزگىللىك سايلام مەزگىلىدە ئۆتكۈزۈلىدۇ.

100 ئەزالىق كېڭەش پالاتاسىدا بولسا، ۋەزىپە ئۆتەش مۇددىتى ئالتە يىل بولغان كېڭەش ئەزالىرىنىڭ تەخمىنەن ئۈچتىن بىر قىسمى ھەر ئىككى يىلدا بىر قېتىم سايلام ئارقىلىق يېڭىلىنىپ تۇرىدۇ.

شۇڭا، بىر پارتىيەنىڭ ئاۋام پالاتاسىدا كۆپ سانلىقنى ئىگىلىشى ئۈچۈن 218 ئورۇن كېرەك بولسا، كېڭەش پالاتاسىدا 51 ئورۇن كېرەك بولىدۇ.