«تېلېگراف» گېزىتىنىڭ خەۋىرىگە قارىغاندا، ئەنگلىيە ئىسرائىلىيەنىڭ غەززەدىكى قىرغىنچىلىقىنى سەۋەب كۆرسىتىپ، ئىسرائىلىيە ھەربىي خادىملىرىنى ئەڭ داڭلىق مۇداپىئە ئاكادېمىيەلىرىدىن بىرى بولغان خانلىق مۇداپىئە تەتقىقات ئىنستىتۇتىغا قوبۇل قىلمايدىغان بولغان.
مۇداپىئە مىنىستىرلىقى كېلەر يىلدىن باشلاپ ئىسرائىلىيەنىڭ، 1927-يىلىدىن بۇيان دۇنيانىڭ ھەرقايسى جايلىرىدىن يۇقىرى دەرىجىلىك ئوفىتسېر ۋە ئەمەلدارلارنى تەربىيەلەپ كېلىۋاتقان بۇ ئىنستىتۇتقا كىرىشىنىڭ چەكلىنىدىغانلىقىنى دەلىللىدى.
خەۋەرگە قارىغاندا، بۇ قارار ئىسرائىلىيەلىكلەرنىڭ ۋىنستون چېرچىلنىڭ ھەربىي ۋە پۇقراۋى رەھبەرلەر ئارىسىدا خەلقئارالىق چۈشىنىشنى يېتىلدۈرۈش تەسەۋۋۇرى بىلەن قۇرۇلغان بۇ ئورگاندىن تۇنجى قېتىم رەسمىي چەكلەنگەنلىكى بولۇپ ھېسابلىنىدۇ.
مۇداپىئە مىنىستىرلىقىنىڭ باياناتچىسى ئىسرائىلىيەنىڭ غەززەدىكى ھەرىكەتلىرىنىڭ «خاتا» ئىكەنلىكىنى بىلدۈرۈپ، ھۆكۈمەتنىڭ شۇ سەۋەبتىن ئۇلارنىڭ بۇ ئىنستىتۇتقا كىرىشىنى توختىتىش قارارى ئالغانلىقىنى ئېيتتى.
بۇ قارار ئىسرائىلىيەدە كەسكىن تەنقىدلەرگە ئۇچرىدى. ئىسرائىلىيە مۇداپىئە مىنىستىرلىقىنىڭ باش دېرىكتورى ۋە شۇنداقلا بۇ ئىنستىتۇتنىڭ پۈتتۈرگۈچىسى بولغان ئامىر بارام، بۇ قارارنى «ئۇرۇش ھالىتىدىكى بىر ئىتتىپاقداشقا قىلىنغان ئىنتايىن نومۇسسىز ساداقەتسىزلىك ھەرىكىتى» دەپ ئاتىدى.
بارام مۇداپىئە مىنىستىرلىقىغا يوللىغان خېتىدە بۇ قارارنى «كەمسىتىش ھەرىكىتى» ۋە «بىرتانىيەنىڭ كەڭ قورساقلىق ۋە ساغلام ئەقىل ئەنئەنىسىدىن نومۇسلۇق دەرىجىدە چەتنەپ كېتىش» دەپ تەسۋىرلىدى.
ئىسرائىلىيە 2023-يىلى ئۆكتەبىردىن بۇيان غەززەدە كۆپىنچىسى ئاياللار ۋە بالىلار بولۇپ تەخمىنەن 65 مىڭ پەلەستىنلىكنى ئۆلتۈردى.
ئىسرائىلىيە غەززەنىڭ كۆپ قىسىم جايلىرىنى خارابىلىككە ئايلاندۇرۇش بىلەن بىرگە، پۈتكۈل نوپۇسنى دېگۈدەك ئۆي-ماكانلىرىدىن ئايرىدى.
