ئىران پارلامېنتى ۋە مۇزاكىرە ھەيئىتىنىڭ باشلىقى مۇھەممەد باقىر قالىباف، ئۆز دۆلىتىنىڭ ۋە مىللىتىنىڭ ھوقۇقلىرىنى قوغداش مەسىلىسىدە ئەسلا يول قويمايدىغانلىقىنى بىلدۈردى.
ئانادولۇ ئاگېنتلىقىنىڭ خەۋەرىگە قارىغاندا، ئىران پارلامېنتى ۋە مۇزاكىرە ھەيئىتىنىڭ باشلىقى مۇھەممەد باقىر قالىباف، پاكىستان ئارمىيە باش ئىشتاب باشلىقى ئاسىم مۇنىر بىلەن تېھراندا ئېلىپ بارغان ئۇچرىشىشىدا: «ئەگەر ئامېرىكا پېرىزىدېنتى دونالد ترامپ ئۇرۇشنى قايتىدىن باشلىسا، بۇ ئامېرىكا ئۈچۈن ئۇرۇشنىڭ تۇنجى كۈنىدىكىدىنمۇ بەكرەك ۋەيران قىلغۇچ ۋە ئازابلىق بولىدۇ» دېگەن.
ئىران دۆلەت تېلېۋىزىيەسىنىڭ خەۋەر قىلىشىچە، قالىباف مۇنىر بىلەن ئېلىپ بارغان ئۇچرىشىشىدا كۈنتەرتىپتىكى ۋەزىيەتكە قارىتا باھالاشلاردا بولغان.
ئۆز دۆلىتىنىڭ ۋە مىللىتىنىڭ «ئامېرىكاغا ئوخشاش ئىشەنچسىز بىر تەرەپكە قارشى» ئۆز ھوقۇقلىرىنى قوغداش مەسىلىسىدە ئەسلا مۇرەسسە قىلمايدىغانلىقىنى ئېيتقان قالىباف، ئىران قوراللىق كۈچلىرىنىڭ ئۇرۇش توختىتىش مۇساپىسى بويىچە ئۆزىنى قايتىدىن يېڭىلىغانلىقىنى تەكىتلىدى ھەمدە: «ئەگەر ترامپ ئۇرۇشنى قايتىدىن باشلىسا، بۇ ئامېرىكا ئۈچۈن ئۇرۇشنىڭ تۇنجى كۈنىدىكىدىنمۇ بەكرەك ۋەيران قىلغۇچ ۋە ئازابلىق بولىدۇ» دەپ ئاگاھلاندۇرۇش بەردى.
قالىباف ئامېرىكانىڭ ئىلگىرىمۇ مۇزاكىرە باسقۇچىدا تۇرۇپ ئىرانغا ھۇجۇم قىلغانلىقىنى ئەسلەتتى، ئامېرىكانىڭ نۆۋەتتىكى ۋەزىيەتتىمۇ پاكىستاننىڭ ۋاسىتچىلىقى بىلەن ئېلان قىلىنغان ئۇرۇش توختىتىش كېلىشىمىگە خىلاپلىق قىلىپ دېڭىز قامالى يۈرگۈزۈۋاتقانلىقىنى، ھازىر بولسا بۇ قامالنى ئەمەلدىن قالدۇرۇش ئۈچۈن تىرىشچانلىق كۆرسىتىلىۋاتقانلىقىنى ئېيتتى.
مۇنىر ئۆز دۆلىتىنىڭ ۋە مىللىتىنىڭ، ئىران خەلقىنىڭ كەلگۈسى ئۈچۈن گۈزەل تىلەكلەردە بولىدىغانلىقىنى تىلغا ئالدى.
