دونالد ترامپ ھاكىمىيىتى سومالىنى ئۆز ئىچىگە ئالغان نۇرغۇن دۆلەتلەردىن كەلگەن مۇساپىرلار توپلىشىپ ياشايدىغان ئامېرىكا قوشما ئىشتاتلىرىنىڭ مېين ئىشتاتىدا كۆچمەنلەرنى تەكشۈرۈش ۋە تۇتقۇن قىلىش ھەرىكىتىنى باشلىدى.
دائىرىلەر پىرېزىدېنت ترامپنىڭ بارغانسېرى كۈچىيىۋاتقان كۆچمەنلەرنى نازارەت قىلىش بېسىمىنىڭ بىر قىسمى سۈپىتىدە، مۇشۇ ھەپتە 100 دىن ئارتۇق فېدېراتسىيە خادىمىنىڭ مەزكۇر شەرقىي شىمال ئىشتاتىغا يېتىپ بارغانلىقىنى بىلدۈردى. دائىرىلەرنىڭ بىرى مەزكۇر ھەرىكەتنىڭ ئاساسلىق نىشانىنىڭ مۇساپىرلار بولىدىغانلىقىنى سۆزلىرىگە ئىلاۋە قىلدى.
مېين ئىشتاتىنىڭ سىياسىي رەھبەرلىرى ۋە كۆچمەن مىللەتلەر ئالدىنقى ھەپتە قوشۇمچە كۆچمەنلەر خادىملىرىنىڭ كېلىشىگە تەييارلىق قىلىپ قويغان ئىدى. مېين ئىشتاتىنىڭ ۋالىيسى، دېموكرات جانېت مىللس ئالدىنقى ھەپتە ترامپ ھاكىمىيىتىنىڭ ئىغۋاگەرچىلىك خاراكتېرلىك ھەرىكەتلىرىنىڭ ئىشتاتتا «قارشى ئېلىنمايدىغانلىقى» نى ئېيتقان ئىدى.
ترامپ 2025-يىلىنىڭ باشلىرىدىن بۇيان دېموكراتلار باشقۇرۇۋاتقان شەھەر ۋە ئىشتاتلاردا كۆچمەنلەرگە قارىتىلغان تەدبىرلەرنىڭ دائىرىسىنى كېڭەيتتى.
يېقىنقى ھەپتىلەردە، ترامپ ھاكىمىيىتىنىڭ كۆچمەنلەرگە تېخىمۇ كەڭ كۆلەملىك بېسىم ئىشلىتىش تەدبىرلىرىنىڭ بىر قىسمى دائىرىسىدە، تەخمىنەن 3 مىڭ فېدېراتسىيە خادىمى مىننېسوتا ئىشتاتىغا ئەۋەتىلدى.
