فرانسىيە تاشقى ئىشلار مىنىستىرى ژان نوئېل بارروت ئىشغالىيەت ئاستىدىكى شەرقىي قۇددۇستا ئىسرائىلىيەلىك بىر ئەرنىڭ بىر راھىبىگە قىلغان بۇ قېتىمقى ھۇجۇمىنى ئەيىبلىدى.
بارروت X ھېسابىدا ئېلان قىلغان باياناتىدا، ھۇجۇمنى "نومۇسسىزلارچە" دەپ سۈپەتلىدى.
بارروت: "مۇقەددەس زېمىنلاردا كۆپىيىۋاتقان خىرىستىيانلارغا قارشى ھەرىكەتلەرنىڭ ئاخىرلىشىشى ئۈچۈن بېرىلىدىغان جازا ئىبرەتلىك بولۇشى كېرەك. كاتولىك جامائىتى ۋە مۇقەددەس جايلارنى قوغداش يۆنىلىشىدىكى تارىخىي ۋەزىپىسىگە سادىق بولغان فرانسىيە، بۇ ھەرىكەتلەرگە ھېچقانداق ئەھۋالدا سۈكۈت قىلىپ تۇرالمايدۇ" دېدى.
بارروتنىڭ باياناتى، ئىسرائىلىيە ساقچىلىرى "ئىرقچىلىق غەرىزى بىلەن سادىر قىلىنغان" دەپ باھالىغان ۋە 36 ياشلىق بىر ئىسرائىلىيەلىك ئەرنىڭ ئىشغال ئاستىدىكى شەرقىي قۇددۇستا بىر فرانسىيەلىك راھىبىگە ھۇجۇم قىلغاندىن كېيىن نازارەتكە ئېلىنغانلىقى ھەققىدىكى خەۋەرلەردىن كېيىن ئېلان قىلىندى.
دۇنيانىڭ ئوخشىمىغان دۆلەتلىرىدىن كەلگەن يۈزلىگەن دىنىي زات ۋە راھىبىلەر ئىشغال ئاستىدىكى شەرقىي قۇددۇستا چېركاۋلاردا ۋە دىنىي ئورۇنلاردا ۋەزىپە ئۆتىمەكتە.
يېقىنقى يىللاردا قۇددۇستا ئىسرائىلىيەلىكلەرنىڭ مۇسۇلمان ۋە خىرىستىيان دىنىي زاتلىرىغا ۋە مۇقەددەس جايلىرىغا قارىتىلغان ھۇجۇملىرىدا كۆرۈنەرلىك ئېشىش بولدى.
قۇددۇستىكى چېركاۋ رەھبەرلىرى ئىسرائىلىيە دائىرىلىرىگە بۇ خىل ھۇجۇملارنى توختىتىش ئۈچۈن كەسكىن قەدەملەرنى تاشلاش چاقىرىقىنى كۆپ قېتىم تەكرارلىدى.
بۇ ھۇجۇم، ئۆتكەن ئاي بىر ئىسرائىلىيە ئەسكىرىنىڭ بازغان بىلەن ئەيسا ئەلەيھىسسالامنىڭ ھەيكىلىنى چىقىۋاتقانلىقى كۆرسىتىلگەن سىن كۆرۈنۈشىدىن كېيىن يۈز بەردى.
پەلەستىننىڭ ئىستاتىستىكىلىق مەلۇماتلىرىغا قارىغاندا، 2023-يىلى ئۆكتەبىردىن بۇيان ئىشغالىيەت ئاستىدىكى غەربىي قىرغاقتا ئىسرائىلىيە كۈچلىرى ۋە قانۇنسىز يەھۇدىي كۆچمەنلەرنىڭ زوراۋانلىقى نەتىجىسىدە ئاز دېگەندە 1155 پەلەستىنلىك ئۆلتۈرۈلدى، تەخمىنەن 11 مىڭ 750 كىشى يارىلاندى ۋە 22 مىڭغا يېقىن كىشى نازارەتكە ئېلىندى.
