بۇ پائالىيەتنى تەشكىللىگۈچىلەر غەززەگە قاراپ يولغا چىققان يەر شارى «سۇمۇد» ياردەم فىلوتىنىڭ مىسىرنىڭ ئاقدېڭىز قىرغىقىدىكى مارسا ماتروھنىڭ شىمالىغا يېتىپ بارغانلىقىنى جاكارلىدى.
خەلقئارا غەززە قورشاۋىنى بۇزۇش كومىتېتى يەكشەنبە كۈنى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، فىلوتنىڭ بىرنەچچە سائەت ئىچىدە ئىسكەندىرىيە شەھىرىنىڭ شىمالىدىكى دېڭىز تەۋەلىكىگە قاراپ يولغا چىقىشىنىڭ مۆلچەرلىنىۋاتقانلىقىنى بىلدۈردى.
باياناتتا: «بىز غەززەگە يېقىنلاشقانسېرى، زىيونىستلارنىڭ خالىغان ۋاقىتتا بىزگە قارشى ئۇرۇش جىنايىتى سادىر قىلىشىنى مۆلچەرلەۋاتىمىز» دېيىلدى.
بۇنىڭدىن باشقا، يەر شارى «سۇمۇد» فىلوتى مۇنداق بايانات ئېلان قىلدى:
«بىزنىڭ ئالدىنقى پاراخوتلىرىمىز OHWAYLA ۋە ALL IN ھازىر غەززەدىن 678 كىلومېتىر يىراقلىقتا بولۇپ، تەخمىنەن 3 - 4 كۈن ئىچىدە غەززەدە يېتىپ بارالايدۇ. فىلوتىمىزغا قاراپ يولغا چىققان ئىككى يېڭى پاراخوتنىڭ قوشۇلۇشى بىلەن پاراخوتلارنىڭ سانى 44 كە يەتتى.»
باياناتتا يەنە مۇنداق دېيىلدى: «ئىككى كۈن ئىچىدە فىلوت ناھايىتى خەتەرلىك رايونغا كىرىدۇ. بىزنىڭ ئىرادىمىز قەتئىي، لېكىن ھازىر دەل يەر شارى خاراكتېرلىك ئاڭلىقلىق ۋە ھەمدەمدە بولۇشىڭىزغا ئەڭ ئېھتىياجلىق پەيتتۇر.»
بۇنىڭدىن ئىلگىرى، مەزكۇر كومىتېت ژۇرنالىستلار ۋە سەھىيە خىزمەتچى - خادىملىرىنى توشۇيدىغان بىر پاراخوتنى ئىسرائىلىيە قورشاۋى ئاستىدىكى غەززەگە ئەۋەتىدىغانلىقىنى ئۇقتۇرغان ئىدى.
كومىتېت تەرىپىدىن بۇ ھەقتە ئېلان قىلىنغان باياناتتا، 1-ئۆكتەبىر كۈنى يولغا چىقىدىغان پاراخوتتا 100 دىن ئارتۇق خەلقئارالىق تاراتقۇ خادىملىرى ۋە دوختۇرلارنىڭ توشۇلىدىغانلىقى بىلدۈرۈلدى.
پاراخوتلارنى توسۇش پىلانى
ئىسرائىلىيەنىڭ دۆلەتلىك رادىيو - تېلېۋىزىيە ئىستانسىسى KAN نىڭ خەۋىرىگە قارىغاندا، ئىسرائىلىيە فىلوتنى توسۇش ۋە كونترول قىلىشقا تەييارلىق قىلىۋاتقان بولۇپ، فىلوتنىڭ تۆت كۈن ئىچىدە غەززە دېڭىز قىرغاقلىرىغا يېتىپ كېلىشى مۆلچەرلەنمەكتە ئىكەن. بۇ، يەھۇدىيلارنىڭ يۆم كىپپۇر بايرىمىغا توغرا كېلىدىكەن.
ئىسرائىلىيەنىڭ دېڭىز كوماندىرلىرى ئەترىتى Shayetet 13 ئاخىرقى كۈنلەردە «پاراخوتلارنى دېڭىزدا قولغا چۈشۈرۈش» ئۈچۈن مانېۋىرلىرىنى ئېلىپ بېرىۋاتقان بولۇپ، بۇ مانېۋىرلارنىڭ «پائالىيەتكە قاتناشقۇچىلارغا زىيان يەتكۈزۈشنى ئەڭ تۆۋەن چەككە چۈشۈرۈشنى» مەقسەت قىلىدىغانلىقى ئىلگىرى سۈرۈلمەكتە ئىكەن.
بۇنىڭدىن باشقا، ئىسرائىلىيە يېقىندا فىلوت تەشكىللىگۈچىلىرى بىلەن ئالاقىلىشىپ، ئىنسانپەرۋەرلىك ياردەملىرىنى ئاشكېلون پورتى، گىرېتسىيەنىڭ كونتروللۇقىدىكى جەنۇبىي قىبرىس، ھەتتا ۋاتىكان ئارقىلىق يۆتكەشنى تەكلىپ قىلغان، لېكىن تەشكىللىگۈچىلەر بۇنى رەت قىلغان. تېل ئاۋىۋ بۇ ھەرىكەتنى قەستەن ئىغۋاگەرچىلىك دەپ قارىغان.
ئەگەر مۆلچەرلىنىۋاتقىنىدەك ئىسرائىلىيە ھەربىي ھەرىكەت قوللانسا، بۇ، ئالدىنقى ئىيۇن ۋە ئىيۇل ئايلىرىدا Madleen ۋە Handala ياردەم پاراخوتلىرىنىڭ توسقۇنلۇققا ئۇچرىشىنى ئەكس ئەتتۈرىدىكەن.
فىلوت غەززەگە قارىتىلغان ئىسرائىلىيە قورشاۋىنى بۇزۇش، بولۇپمۇ داۋالاش ئەسلىھەلىرىنى ئۆز ئىچىگە ئالغان ئىنسانپەرۋەرلىك ياردەملىرىنى يەتكۈزۈش مەقسىتىدە بۇ ئاينىڭ باشلىرىدا يولغا چىققان ئىدى.
2-مارتتىن بۇيان، ئىسرائىلىيە غەززەنىڭ چېگرا ئېغىزلىرىنى پۈتۈنلەي تاقاپ، يېمەكلىك ۋە ياردەم ماشىنىلىرىنىڭ كىرىشىنى توسۇپ، رايوندىكى ئاچارچىلىقنى چوڭقۇرلاشتۇرۇپ كەلمەكتە.
ئىشغالچى ئىسرائىلىيە ئىلگىرىمۇ غەززەگە كېتىۋاتقان پاراخوتلارنى توسۇش، پاراخوتلارنى مۇسادىرە قىلىش ۋە پائالىيەتچىلەرنى چېگرادىن قوغلاپ چىقىرىشتەك قىلمىشلارنى سادىر قىلغان ئىدى. تەنقىدچىلەر بۇ خىل ھەرىكەتلەرنى دېڭىز قاراقچىلىقى دەپ ئاتىماقتا.
ئىسرائىلىيە ئارمىيەسى 2023-يىلى ئۆكتەبىردىن بۇيان غەززەدە كۆپىنچىسى ئاياللار ۋە بالىلاردىن تەشكىل تاپقان 66 مىڭدىن ئارتۇق پەلەستىنلىكنى ئۆلتۈردى. ئۈزلۈكسىز داۋاملىشىۋاتقان بومباردىمان قىلىش ھەرىكەتلىرى رايوننى ياشاش مۇمكىن بولمايدىغان ھالغا كەلتۈرۈپ، ئاچارچىلىق ۋە كېسەللىكلەرنىڭ تارقىلىشىنى كەلتۈرۈپ چىقاردى.
