تۈركىيە ئائىلە ۋە ئىجتىمائىي مۇلازىمەت مىنىستىرى ماھىنۇر ئۆزدەمىر گۆكتاش، ئەنقەرەنىڭ پەلەستىن ۋە غەززەدىكى بالىلارغا قارىتىلغان قوللىشىنى ۋە ھەمدەملىكىنى يەنە بىر قېتىم تەكىتلىدى.
گۆكتاش ۋە پەلەستىن ئىجتىمائىي تەرەققىيات مىنىستىرى ساماھ ھاماد، ئىسرائىلىيە ھۇجۇملىرىدىن كېيىن غەززەدىن تۈركىيەگە ئېلىپ كېلىنگەن كىچىك بالىلار بىلەن شەنبە كۈنى بىر يەرگە جەم بولدى. مىنىستىرلار پايتەخت ئەنقەرەدىكى بىلكەنت ئەنئەنىۋى تەنتەربىيە ياشلار كۇلۇبىدا بالىلار بىلەن بىرلىكتە ۋاقىت ئۆتكۈزۈپ، ئوقيا ئېتىش پائالىيەتلىرىگە قاتناشتى ھەمدە بالىلارنىڭ ئات مىنىشىنى كۆزدىن كەچۈردى.
گۆكتاش پائالىيەتتىن كېيىن مۇخبىرلارغا بەرگەن باياناتىدا: «تۈنۈگۈنكىگە ئوخشاش بۈگۈنمۇ، ئەتىمۇ ۋە ھەر دائىم پەلەستىنلىك قېرىنداشلىرىمىزنىڭ ۋە غەززە بالىلىرىنىڭ يېنىدا بولۇشنى داۋاملاشتۇرىمىز» دېدى.
گۆكتاش، ئىسرائىلىيە ھۇجۇملىرىنىڭ زىيانكەشلىكىگە ئۇچرىغانلارنىڭ كۆپ قىسمىنى تەشكىل قىلىدىغان غەززە ئاياللىرى ۋە بالىلىرى ئۈچۈن قاتتىق ئازانلىنىۋاتقانلىقىنى تەكىتلەپ«دۇنيانىڭ كۆز ئالدىدا ئېلىپ بېرىلىۋاتقان ئىرقىي قىرغىنچىلىقتا ھېچقانداق ئەخلاقىي قىممەت قاراشلىرىنى نەزەرگە ئالمايۋاتقان ئىسرائىلىيە ئەپسۇسكى، مەكتەپلەرنىمۇ، دوختۇرخانىلارنىمۇ بومباردىمان قىلىشنى داۋاملاشتۇرۇۋاتىدۇ» دېدى ھەمدە تۈركىيەنىڭ جۇمھۇر رەئىس رەجەپ تاييىپ ئەردوغاننىڭ رەھبەرلىكىدە پەلەستىن خەلقىنىڭ ئاۋازى بولۇشنى داۋاملاشتۇرۇۋاتقانلىقىنى ئييتتى.
غەززەدىكى يېمەكلىك ۋە ئىنسانپەرۋەرلىك ياردەم كرىزىسى
ساماھ ھاماد بىلەن بىرلىكتە، مائارىپ، سەھىيە مۇلازىمىتى ۋە پسىخولوگىيەلىك-ئىجتىمائىي ياردەم ساھەسىدە داۋاملىشىۋاتقان خىزمەتلەرنى كۆزىتىش مەقسىتىدە ئېلىپ بارغان زىيارىتى جەريانىدا، تۈركىيەنىڭ بۇ مەسىلىدىكى قەتئىي ئىرادىسىنى تەكىتلىگەن گۆكتاش، پەلەستىنلىك قېرىنداشلار ۋە غەززەلىك بالىلار بىلەن ھەمكارلىقنى داۋاملاشتۇرىدىغانلىقىنى يەنە بىر قېتىم تەكىتلىدى.
ھاماد، غەززەلىك بالىلار بىلەن بىرگە بولغانلىقىدىن پەخىرلىنىدىغانلىقىنى ئىپادىلەپ، غەززەدىن تارقاقلاشتۇرۇلغان كېسەل بالىلار ۋە تۈركىيەدە داۋالىنىۋاتقان ئاتا-ئانىلار ئۈچۈن تۈركىيە ئائىلە ۋە ئىجتىمائىي مۇلازىمەت مىنىستىرلىقىنىڭ نازارىتى ئاستىدا ئېلىپ بېرىلغان خىزمەتلەرگە يۇقىرى باھا بەدى.
مىنىستىر ھاماد، گۆكتاشقا ئېھتىياجلىرىنى يېقىندىن كۆزىتىۋاتقانلىقى ئۈچۈن رەھمەت ئېيتتى.
ھاماد: «غەززەدە داۋاملىشىۋاتقان ھۇجۇملار ۋە ئاچارچىلىق ھەر بىر پەلەستىنلىككە تەسىر كۆرسىتىۋاتىدۇ، بۇنىڭغا ئىشىنىمىز. تەخمىنەن 80 كۈندىن بۇيان غەززەگە يېمەكلىك ياكى ئىنسانپەرۋەرلىك ياردىمى كىرمىدى. ئائىلىلەر ئۈچۈن سۇ، سەھىيە مۇلازىمىتى ياكى مائارىپ ئىمكانىيىتى يوق، نۇرغۇن كىشى ھاياتىدىن ئايرىلدى. بۈگۈن بىز ئۇچراتقان بالىلارنىڭ كۆپىنچىسى كەم دېگەندە بىر يېقىنىدىن ئايرىلىپ قالدى»دېدى.
تۈركىيەگە مىننەتدارلىقىنى بىلدۈرگەن ھاماد، بۇ زىيارەتنىڭ ئىككى دۆلەتنى «بىر داۋا ئەتراپىدا بىرلەشكەن ئىككى مىللەت» سۈپىتىدەبىرلەشتۈرۈپ تېخىمۇ كۈچەيتىشىنى ئۈمىد قىلىدىغانلىقىنى ئېيتتى.
گۆكتاش يەنە، جۇمھۇر رەئىس ئەردوغاننىڭ 2026 - 2035-يىللىرىنى «ئائىلە ۋە نوپۇس ئون يىللىقى» دەپ ئېلان قىلىشى بىلەن، تۈركىيەنىڭ مائارىپ، سەھىيە، ئىشقا ئورۇنلىشىش، خىزمەت ۋە ئىجتىمائىي ساھەلەردە ئائىلە مەركەز قىلىنغان سىياسەتلەرگە ئالدىنقى قاتاردىن ئورۇن بېرىلىدىغانلىقىنى سۆزلىرىگە ئىلاۋە قىلدى.
