Axios  نىڭ خەۋىرىگە قارىغاندا، 28 ماددىلىق تەكلىپ لايىھەسى ئۇكرائىنادا تىنچلىق ئورنىتىش، بىخەتەرلىكنى  كاپالەت ئاستىغا ئېلىش، ياۋروپانىڭ مۇقىملىقى ۋە ئامېرىكانىڭ كىيېۋ ھەم موسكۋا بىلەن بولغان كەلگۈسى مۇناسىۋەتلىرى قاتارلىق مەزمۇنلارنى ئۆز ئىچىگە ئالىدىكەن.

Axios  نىڭ سەيشەنبە كۈنى خەۋەر قىلىشىچە، ترامپ ھۆكۈمىتى رۇسىيە - ئۇكرائىنا ئۇرۇشىنى ئاخىرلاشتۇرۇش ئۈچۈن، موسكۋا بىلەن «مەخپىي» ھالدا يېڭى بىر پىلان لايىھەسى ئۈستىدە خىزمەت ئىشلىمەكتە ئىكەن.

خەۋەرگە ئاساسلانغاندا، ئىسمىنى ئاشكارىلاشنى خالىمىغان ئامېرىكا ۋە رۇسىيە ئەمەلدارلىرى 28 ماددىلىق بۇ پىلاننىڭ، ئۆتكەن ئايدا ئىسرائىلىيە بىلەن پەلەستىن قارشىلىق كۆرسىتىش ھەرىكىتى (ھاماس) ئوتتۇرىسىدا، ئىسرائىلىيەنىڭ غەززەدە ئىككى يىلدىن ئارتۇق داۋاملاشقان ۋەيران قىلغۇچى ئۇرۇشىدىن كېيىن قوبۇل قىلىنغان ترامپنىڭ 20 ماددىلىق غەززە ئۇرۇش توختىتىش پىلانىغا ئاساسەن تۈزۈلگەنلىكىنى بىلدۈرگەن.

خەۋەردە بىلدۈرۈلۈشىچە، مەزكۇر لايىھە تۆت ئاساسلىق تېما ئەتراپىدا شەكىللەنگەن بولۇپ، ئۇلار: ئۇكرائىنادا تىنچلىق ئورنىتىش، بىخەتەرلىك كاپالىتى، تېخىمۇ كەڭ دائىرىلىك ياۋروپا بىخەتەرلىكى ۋە ئامېرىكانىڭ ھەم كىيېۋ ھەم موسكۋا بىلەن بولغان كەلگۈسى مۇناسىۋەتلىرىدىن ئىبارەت ئىكەن.

پىلاننىڭ شەرقىي ئۇكرائىنادىكى زېمىن كونتروللۇقىغا ئوخشاش نېگىزلىك ئىختىلاپلارنى قانداق بىر تەرەپ قىلىدىغانلىقىغا ئائىت تەپسىلاتلار بولسا تېخى ئېنىق ئەمەس ئىكەن.

بىر ئامېرىكا ئەمەلدارى ترامپنىڭ ئالاھىدە ۋەكىلى ستىۋ ۋىتكوفنىڭ بۇ خىزمەتكە رىياسەتچىلىك قىلىۋاتقانلىقىنى ۋە رۇسىيە ۋەكىلى كىرىل دىمىترىيېۋ بىلەن كەڭ دائىرىلىك سۆھبەتلەرنى ئېلىپ بارغانلىقىنى ئېيتتى. دىمىترىيېۋنىڭ ئۆكتەبىرنىڭ ئاخىرىدا مىيامىدا ئۇدا ئۈچ كۈن ترامپ گۇرۇپپىسى بىلەن بىر يەرگە جەم بولغانلىقى بىلدۈرۈلدى.

ئاقساراي ئەمەلدارى ترامپنىڭ «ئەگەر ماسلىشىشچان پوزىتسىيە بىلدۈرۈلسە، بۇ مەنىسىز ئۇرۇشنى ئاخىرلاشتۇرۇش پۇرسىتىنىڭ بارلىقىغا ئىشىنىدىغانلىقى» نى ۋە ئامېرىكا ئەمەلدارلىرىنىڭ  پىلان ھەققىدە ياۋروپادىكى شېرىكلىرىگە مەلۇمات بېرىشنى باشلىغانلىقىنى بىلدۈردى.

ئامېرىكانىڭ يۇقىرى دەرىجىلىك ھەربىي ئەمەلدارلىرى ئۇكرائىنادا

Politico  نىڭ چارشەنبە كۈنى خەۋەر قىلىشىچە، ئامېرىكانىڭ ئىككى نەپەر يۇقىرى دەرىجىلىك ھەربىي ئەمەلدارى، رۇسىيە بىلەن توختاپ قالغان تىنچلىق سۆھبەتلىرىنى قايتا جانلاندۇرۇش مەقسىتىدە، كىيېۋغا ئۇرۇش مەزگىلىدىكى ئاز ئۇچرايدىغان بىر قېتىملىق زىيارەتنى ئېلىپ بارغان. زىيارەت ئالدىن ئېلان قىلىنمىغان.

 Politico  نىڭ پىلاندىن خەۋەردار كىشىلەرنىڭ سۆزىنى نەقىل كەلتۈرۈپ خەۋەر قىلىشىچە، ھەربىي ئىشلار مىنىستىرى دان دىرىسكول بىلەن باش ئىشتاب باشلىقى گېنېرال رەندى جورج ئۇكرائىنا پىرېزىدېنتى ۋولودىمىر زېلېنسكىي، يۇقىرى دەرىجىلىك قوماندانلار ۋە پارلامېنت ئەزالىرى بىلەن كۆرۈشىدىكەن.

Wall Street Journal  ئايرىم بىر خەۋىرىدە، دىرىسكولنىڭ كېيىنچە رۇسىيە ئەمەلدارلىرى بىلەنمۇ كۆرۈشۈشىنىڭ كۈتۈلۈۋاتقانلىقىنى بىلدۈردى.

ئاقساراي ۋە بەش بۇرجەكلىك بىنا تەرەپتىن مەزكۇر مەسىلە توغرىسىدا تېخىچە ھېچقانداق بايانات ئېلان قىلىنمىدى.

Wall Street Journal ئاقساراينىڭ دىرىسكول ۋە يۇقىرى دەرىجىلىك قوماندانلارغا مۇراجىئەت قىلىشىدىكى سەۋەبلەردىن بىرىنىڭ، موسكۋانىڭ ھەربىي ۋاسىتىچىلەر ئارقىلىق تېخىمۇ ياخشى جاۋاب بېرەلەيدىغانلىقىغا بولغان ئۈمىد ۋە ئىلگىرىكى كۆپىنچىسى نەتىجىسىز ئاخىرلاشقان تىرىشچانلىقلاردىن كېلىپ چىققان ئۈمىدسىزلىك ئىكەنلىكىنى يازدى.

Politico  نىڭ خەۋىرىگە قارىغاندا، ئامېرىكا ھەربىي ئەمەلدارلىرىنىڭ كىيېۋدىكى سۆھبەتلىرىدە، ئۇكرائىنانىڭ ئۇرۇش مەيدانىدىكى ئېھتىياجلىرى ۋە موسكۋا بىلەن توختاپ قالغان تىنچلىق مۇساپىسىنى قايتا جانلاندۇرۇش تىرىشچانلىقلىرىنى ئۆز ئىچىگە ئالغان تېخىمۇ كەڭ دائىرىلىك بىر ئىستراتېگىيە مۇزاكىرە قىلىنىدىكەن.