جۇمھۇر رەئىس رەجەپ تاييىپ ئەردوغان ئامېرىكا قوشما ئىشتاتلىرى پىرېزىدېنتى دونالد ترامپ بىلەن تېلېفوندا سۆھبەت ئۆتكۈزدى. جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسىنىڭ باياناتىغا قارىغاندا، سۆھبەتتە تۈركىيەئامېرىكا مۇناسىۋەتلىرىدىن باشقا يەنە رايونلۇق ۋە خەلقئارالىق مەسىلىلەر ئەتراپلىق مۇزاكىرە قىلىنغان.
سۆھبەت جەريانىدا جۇمھۇر رەئىس ئەردوغان ئىران بىلەن ئامېرىكا ئوتتۇرىسىدىكى جىددىيچىلىكنى ھەل قىلىشتا دىپلوماتىيە يوللىرىدىن ئەڭ يۇقىرى دەرىجىدە پايدىلىنىشنىڭ مۇھىملىقىنى تەكىتلىگەن. ئۇ سۆھبەتلەرنىڭ داۋاملىشىشىنى ئۈمىد قىلىدىغانلىقىنى، تۈركىيەنىڭ تىنچلىقنى كاپالەتكە ئىگە قىلىش تىرىشچانلىقلىرىنى ئىزچىل قوللايدىغانلىقىنى بىلدۈردى.
ئەردوغان يەنە پاكىستان ۋە سەئۇدى ئەرەبىستان بىلەن بىرلىكتە ئىمزالانغان قوشما مۇداپىئە كېلىشىمىنىڭ رايونلۇق مۇقىملىق ۋە خەۋپسىزلىككە كاپالەتلىك قىلىش يولىدىكى كۈچلۈك بىر قەدەم ئىكەنلىكىنى تىلغا ئالدى.
غەززە مەسىلىسى توغرىلىقمۇ توختالغان ئەردوغان، غەززە تىنچلىق مۇساپىسىدە ئىككىنچى باسقۇچقا ئۆتۈش نىشان قىلىنغان بىر پەيتتە، ئىسرائىلىيە ھۆكۈمىتىنىڭ پەلەستىنلىكلەرگە قاراتقان زوراۋانلىق ھەرىكەتلىرىنى ئەۋج ئالدۇرۇۋاتقانلىقىنى ئەسكەرتتى. ئۇ تۈركىيەنىڭ رايوندىكى ئۇزۇن مۇددەتلىك تىنچلىق ئورنىتىش ۋە غەززەنى قايتا قۇرۇش خىزمەتلىرىنى داۋاملىق قوللايدىغانلىقلىرىنى تەكىتلىدى.
