ئەردوغان دونالد ترامپنىڭ مۇھاسىرە ئىچىدىكى غەززەدە ئۇرۇش توختىتىشنى ئەمەلگە ئاشۇرۇش ئۈچۈن كۆرسەتكەن تىرىشچانلىقلىرىغا يۇقىرى باھا بېرىپ: «غەززەدە تۆكۈلۈۋاتقان قاننىڭ توختىتىلىشى ۋە ئۇرۇش توختىتىشنىڭ ئەمەلگە ئاشۇرۇلۇشى ئۈچۈن ئامېرىكا پىرېزىدېنتى ترامپنىڭ كۆرسەتكەن تىرىشچانلىقى ۋە يېتەكچىلىكىگە يۇقىرى باھا بېرىمەن. تەرەپلەر قوبۇل قىلىدىغان ئادىل ۋە مۇقىم بىر تىنچلىقنىڭ ئورنىتىلىشى ئۈچۈن تۈركىيە بولۇش سۈپىتىمىز بىلەن بىزمۇ بۇ مۇساپىگە داۋاملىق تۆھپە قوشىمىز» دېدى.
بۇ باياناتلار ترامپنىڭ ۋاشىنگتوندا نېتانياھۇ بىلەن بىرلىكتە ئۆتكۈزگەن مۇخبىرلارنى كۈتۈۋېلىش يىغىنىدا، غەززە ئۇرۇش توختىتىش پىلانىنىڭ ئاساسلىق نۇقتىلىرىنى جاكارلىغاندىن كېيىن ئېلان قىلىندى.
بۇ تەكلىپ ئىسرائىلىيەلىك ئەسىرلەرنىڭ قويۇپ بېرىلىشى ۋە ھاماسنىڭ قورالسىزلاندۇرۇلۇشىنى ئۆز ئىچىگە ئالىدۇ.
ترامپ مۇخبىرلارنى كۈتۈۋېلىش يىغىنىدا ئىسرائىلىيە رەھبىرىنىڭ «بىر پەلەستىن دۆلىتىگە ئوچۇق-ئاشكارا قارشى ئىكەنلىكىنى» كۆرسىتىپ، «بۇنى چۈشەنگەنلىكىنى» ئىپادىلىدى.
ئىسرائىلىيە مۇھاسىرە ئىچىدىكى غەززەدە ھازىرغىچە كۆپىنچىسى ئاياللار ۋە بالىلارنى ئۆز ئىچىگە ئالغان 66 مىڭدىن ئارتۇق پەلەستىنلىكنى ئۆلتۈردى.
غەززەنىڭ كۆپ قىسمىنى خارابىلىككە ئايلاندۇرغان ئىسرائىلىيە، رايوندىكى نوپۇسنىڭ ئاساسەن دېگۈدەك ھەممىسىنى ئۆز ماكانىدىن مەجبۇرىي كۆچۈردى.
