مىسىر تاشقى ئىشلار مىنىستىرلىقىنىڭ باياناتىغا ئاساسلانغاندا، تەرەپلەر ئۇرۇش توختىتىش مۇساپىسىنى ئىلگىرى سۈرۈش ۋە مەيداندىكى توسالغۇلارنى بىر تەرەپ قىلىش غايىسى بىلەن، «يول خەرىتىسى» خاراكتېرىدىكى بىر لايىھە نۇسخىسى ئۈستىدە باھالاشلارنى ئېلىپ بارغان.
قاھىرەدىكى ئۇچرىشىشلاردا، ئۇرۇش توختىتىشنىڭ تۇنجى باسقۇچىغا ئائىت مەسئۇلىيەتلەرنى تولۇق تاماملاش، ئىنسانىي ياردەم بۇيۇملىرىنىڭ كىرىش مىقدارىنى ئاشۇرۇش ۋە دائىملىق تىنچلىقنى تەمىنلەشكە قارىتىلغان جىددىي قەدەملەر مۇنازىرە قىلىندى.
يىغىندا يەنە غەززەنى باشقۇرۇش، قايتىدىن قۇرۇپ چىقىش مۇساپىسى، خەلقئارالىق قوشۇنلارنى ئورۇنلاشتۇرۇش ۋە ئۇرۇش توختىتىشنىڭ سىجىللىقىغا ئوخشاش مۇھىم تېمىلار كۈنتەرتىپكە كەلدى.
تەرەپلەرنىڭ، ئومۇمىي جەھەتتىن مۇساپىنى ئىلگىرى سۈرۈش يۆنىلىشىدە «ئىجابىي بىر كەيپىيات» ئىچىدە باھالاشلارنى ئېلىپ بارغانلىقى ئىپادىلەندى.
ئۇرۇش توختىتىش كېلىشىمى 2025-يىلى 10-ئۆكتەبىردە كۈچكە ئىگە بولغان بولۇپ، تۇنجى باسقۇچتا ئەسىرلەرنى ئالماشتۇرۇش، ئىنسانىي ياردەم كىرىشىنى كۆپەيتىش ۋە ئىسرائىلىيە ئارمىيەسىنىڭ بەزى رايونلاردىن قىسمەن چېكىنىشىگە ئوخشاش قەدەملەر يولغا قويۇلغان ئىدى. ئەمما پەلەستىنلىك مەنبەلەر، ئىسرائىلىيەنىڭ كېلىشىم دائىرىسىدىكى مەسئۇلىيەتلىرىنى تولۇق ئادا قىلمىغانلىقىنى ۋە ۋەھشىي ھۇجۇملىرىنى يەنىلا داۋاملاشتۇرۇۋاتقانلىقىنى ئەسكەرتمەكتە.
كىلىشىمنىڭ ئىككىنچى باسقۇچىدا بولسا غەززەنى باشقۇرۇش، قايتىدىن قۇرۇش، خەلقئارالىق كۈچلەرنى ئورۇنلاشتۇرۇش، ئىسرائىلىيە ئارمىيەسىنىڭ تولۇق چېكىنىشى ۋە بەزى سىياسىي-بىخەتەرلىك ئورۇنلاشتۇرۇشلىرىنىڭ مۇزاكىرە قىلىنىشى كۆزدە تۇتۇلماقتا.
پەلەستىنلىك گۇرۇھلار بىلەن كاپالەتچى دۆلەتلەرنىڭ ۋەكىللىرى، ئۇرۇش توختىتىشنىڭ ئىككىنچى باسقۇچىنى يولغا قويۇشقا قاراتقان كۆرۈشۈشلەر ئۈچۈن تۈنۈگۈن قاھىرەدە جىددىي ئالاقىلەرنى باشلىغان ئىدى.
