رۇسىيەنىڭ كونتروللۇقىدىكى زاپورىژيا (Zaporijya) يادرو ئېلېكتر ئىستانسىسى (NGS) دائىرىلىرى ئىجتىمائىي تاراتقۇ ھېساباتىدا بايانات ئېلان قىلىپ  ئۇكرائىنا ئارمىيەسىنىڭ مەزكۇر ئىستانسىدىكى قاتناش بۆلۈمىگە قارىتىپ كەم دېگەندە 14 ئۇچقۇچىسىز ھاۋا ئاپپاراتى (İHA) بىلەن ھۇجۇم قىلغانلىقىنى؛ ھۇجۇملاردا قاتناش بىناسىنىڭ زىيانغا ئۇچرىغانلىقىنى بىلدۈردى.

ھۇجۇملارنىڭ بىرىنىڭ قاتناش بىناسىدىكى ماشىنا ئىسكىلاتى بۆلۈمىدە ئوت ئاپىتى كەلتۈرۈپ چىقارغانلىقى، شۇنداقلا ماشىنا ئىسكىلاتى بىلەن بىرگە ئاسراش رايونىدىكى بىنالاردىمۇ تالاپەتلەرنىڭ كۆرۈلگەنلىكى مەلۇم قىلىندى.

باياناتتا، داۋاملىشىۋاتقان ھۇجۇم تەھدىتى ۋە تەكشۈرۈش خىزمەتلىرىگە قويۇلغان چەكلىمىلەر سەۋەبىدىن، زىياننىڭ كۆلىمىنىڭ تېخى تولۇق ئېنىقلىنالمىغانلىقى ئەسكەرتىلدى.

مەزكۇر ھۇجۇملاردا قازا قىلغان ياكى يارىلانغانلارنىڭ يوقلۇقى بىلدۈرۈلگەن باياناتتا، ئىستانسا خادىملىرىنىڭ ئەسلىھەنىڭ بىخەتەر ۋە مۇقىم ئىشلىشىنى داۋاملاشتۇرۇش ئۈچۈن زۆرۈر تەدبىرلەرنى ئالغانلىقى قەيت قىلىندى.

زاپورىژيا يادرو ئېلېكتر ئىستانسىسى ياۋروپادىكى ئەڭ چوڭ يادرو ئىستانسىسى ھېسابلىنىدۇ. رۇسىيە ئارمىيەسى ئۇكرائىنادىكى ئۇرۇش باشلانغاندىن كېيىن، يەنى 2022-يىلى مارتتا مەزكۇر ئىستانسىنىڭ كونتروللۇقىنى ئۆز قولىغا ئالغان ئىدى.