مىنىستىر چىفتچى ئۆزىنىڭ ئىجتىمائىي تاراتقۇ ھېسابىدا بايانات ئېلان قىلىپ، پىئانتېدوسى ۋە ئۇنىڭ ھەمراھلىقىدىكى ۋەكىللەر ئۆمىكىنى مىنىستىرلىق بىناسىدا كۈتۈۋالغانلىقىنى بىلدۈردى.
ئۇ بۇ قېتىملىق ئۇچرىشىشتا، قانۇنسىز كۆچمەنلەر ۋە ئادەم ئەتكەسچىلىكىگە زەربە بېرىش، تېررورلۇققا قارشى كۈرەش قىلىش، يېڭى ئەۋلاد تەشكىللىك جىنايى ئىشلار گۇرۇھلىرىغا تاقابىل تۇرۇش، شۇنداقلا جىنايەتچىلەرنى ئۆتكۈزۈپ بېرىش قاتارلىق بىخەتەرلىك ساھەسىدىكى ئورتاق كۈنتەرتىپ مەسىلىلىرى ئۈستىدە مۇزاكىرە ئېلىپ بارغانلىقىنى ئېيتتى.
چىفتچى سۆزىنى داۋاملاشتۇرۇپ مۇنداق دېدى:
«بىز چېگرا ھالقىغان تەھدىتلەرگە تاقابىل تۇرۇشتا كۈچلۈك خەلقئارالىق ھەمكارلىق ۋە ئۈنۈملۈك ماسلىشىشنىڭ ئىنتايىن مۇھىملىقىغا ئىشىنىمىز. شۇ مەقسەتتە، ئاق دېڭىزدا قانۇنسىز كۆچمەنلەرگە قارشى بىرلەشمە ھەرىكەتلەرنى قانات يايدۇرۇش، تېررورلۇق تەشكىلاتلىرىنىڭ مەبلەغ توپلاش ۋە تەشۋىقات پائالىيەتلىرىنىڭ ئالدىنى ئېلىش، شۇنداقلا ئىتالىيەدىكى يېڭى ئەۋلاد جىنايى ئىشلار گۇرۇھلىرىنىڭ كاتتىباشلىرى بىلەن ئەزالىرىنى دۆلىتىمىزگە ئۆتكۈزۈپ بېرىش توغرىسىدىكى تەلەپلىرىمىزنى ئوتتۇرىغا قويدۇق.
ئىتالىيەلىك مەنسەپدىشىمىزمۇ ئۆز دۆلىتىدىكى يېڭى ئەۋلاد جىنايى ئىشلار شايكىلىرىغا قارشى قەتئىي پوزىتسىيەدە بولىدىغانلىقىنى ئىپادىلىدى. ئۇ بۇ خىل جىنايەت تورلىرىغا قارشى تېخىمۇ ئۈنۈملۈك زەربە بېرىش ئۈچۈن، بىرلىكتە تەكشۈرۈش ۋە سۈرۈشتۈرۈش گۇرۇپپىلىرىنى قۇرۇپ چىقىشنى تەكلىپ قىلدى.»
