يۈزلىگەن قانۇنسىز ئىسرائىلىيەلىك كۆچمەن ئىشغالىيەت ئاستىدىكى شەرقىي قۇددۇسقا جايلاشقان مەسجىدى ئەقساغا مەجبۇرىي بېسىپ كىردى. پەلەستىنلىك بىر مەسئۇلنىڭ بىلدۈرۈشىچە، بۇ ۋەقە يەھۇدىيلارنىڭ دىنىي بايرىمى «خېمىرتۇرۇچسىز نان بايرىمى» نىڭ ئۈچىنچى كۈنى يۈز بەرگەن.
قۇددۇستىكى ئىسلام ۋەخپە ئىدارىسىدىن بىر مەسئۇل، سەيشەنبە كۈنى ئەتىگەن سائەتلىرىدىن باشلاپ ئىسرائىلىيە ساقچىلىرىنىڭ قوغدىشى ئاستىدا كەم دېگەندە 1220 قانۇنسىز كۆچمەننىڭ بۇ سەزگۈر رايونغا بېسىپ كىرگەنلىكىنى ئېيتتى.
شاھىتلار قانۇنسىز يەھۇدىي كۆچمەنلەرنىڭ مەسجىدىي ئەقسانىڭ غەربىگە جايلاشقان مەغرىبىيە دەرۋازىسى رايونىدىن ئىچكىرى كىرگەنلىكىنى بىلدۈردى.
دۈشەنبە كۈنى تەخمىنەن 1149 قانۇنسىز يەھۇدىي كۆچمەن بېسىپ كىرگەن بولسا، يەكشەنبە كۈنى 494 كىشى ئوخشاش شەكىلدە خېمىرتۇرۇچسىز نان بايرىمىنى تەبرىكلەش ئۈچۈن بۇ رايونغا بېسىپ كىرگەن.
خېمىرتۇرۇچسىز نان بايرىمى، مۇسا ئەلەيھىسسالام دەۋرىدە «ئىسرائىل ئوغۇللىرىنىڭ مىسىردىن چىقىشى» نى خاتىرىلەشنى مەقسەت قىلىدۇ ۋە يەھۇدىي دىنىي كالېندارىدىكى ئەڭ مۇھىم بايراملاردىن بىرى ھېسابلىنىدۇ.
پەلەستىن ۋەخپە ۋە دىنىي ئىشلار مىنىستىرلىقىنىڭ مەلۇماتىغا ئاساسلانغاندا، ئۆتكەن ئاي مۇسۇلمانلارنىڭ مۇقەددەس رامىزان ئېيىنى تەبرىكلىگەن مەزگىلدە، قانۇنسىز يەھۇدىي كۆچمەنلەر مەسچىتكە 21 قېتىم باستۇرۇپ كىرگەن.
قۇددۇس ۋالىيلىقى تەرىپىدىن ئېلان قىلىنغان سانلىق مەلۇماتلارغا ئاساسلانغاندا، 2025 - يىلىنىڭ بىرىنچى چارىكىدە 13064 قانۇنسىز يەھۇدىي كۆچمەن مەسچىتكە باستۇرۇپ كىرگەن.
2003 - يىلىدىن بۇيان ئىسرائىلىيە، قانۇنسىز كۆچمەنلەرنىڭ جۈمە ۋە شەنبە كۈنلىرىدىن باشقا كۈنلەردىمۇ بۇ سەزگۈر رايونغا ھەر كۈنى دېگۈدەك بېسىپ كىرىشىگە يول قويۇپ كەلمەكتە.
مەسجىدى ئەقسا، مۇسۇلمانلار ئۈچۈن دۇنيادىكى ئۈچىنچى چوڭ مۇقەددەس ماكاندۇر. يەھۇدىيلار بولسا بۇ رايوننى «ئىبادەتخانا تېغى» دەپ ئاتاپ، بۇ يەردە قەدىمكى دەۋردە ئىككى يەھۇدىي ئىبادەتخانىسىنىڭ بولغانلىقىنى دەۋا قىلىپ كەلمەكتە.
ئىسرائىلييە 1967 - يىلىدىكى ئەرەب-ئىسرائىلىيە ئۇرۇشى جەريانىدا مەسجىدى ئەقسا جايلاشقان شەرقىي قۇددۇسنى ئىشغال قىلغان ئىدى. 1980 - يىلى بولسا پۈتۈن شەھەرنى ئۆزىگە قانۇنسىز قوشۇۋالغان بولۇپ، ئەمما بۇ ھەرىكەت خەلقئارا تەرىپىدىن ھېچقاچان ئېتىراپ قىلىنمىغان ئىدى.
