كۇۋەيتكە تەۋە ئۇرۇش ئايروپىلانى ئامېرىكانىڭ ئۈچ دانە «F-15» ئۇرۇش ئايروپىلانىنى ئېتىپ چۈشۈردى
كۇۋەيتكە تەۋە «F/A-18» تىپلىق ئۇرۇش ئايروپىلانى «خاتا ئوق چىقىرىش» ۋەقەسىدە ئامېرىكانىڭ ئۈچ دانە «F-15» تىپلىق ئۇرۇش ئايروپىلانىنى ئېتىپ چۈشۈردى.
«ۋال سترېت ژۇرنىلى» (Wall Street Journal) نىڭ خەۋىرىگە قارىغاندا، ئوتتۇرا شەرقتىكى ھەربىي ھەرىكەتلەر جەريانىدا كۇۋەيتكە تەۋە باشقۇرۇلىدىغان بومبىلار خاتا ھالدا ئۈچ دانە «F-15» تىپلىق ئۇرۇش ئايروپىلانىغا تەگكەن؛ ئايروپىلانلاردىكى ئالتە ئامېرىكا ئەسكىرى ئاپتوماتىك سەكرەش ئورۇندۇقىدىن پايدىلىنىپ ئايروپىلاندىن بىخەتەر ھالدا ئايرىلغان.
«ۋال سترېت ژۇرنىلى» گېزىتىنىڭ سەيشەنبە كۈنىدىكى خەۋىرىگە ئاساسلانغاندا، يەكشەنبە كۈنى كۇۋەيتكە تەۋە بىر ئۇرۇش ئايروپىلانى ئوتتۇرا شەرقتىكى ھەرىكەتلەر جەريانىدا، خاتا ھالدا ئامېرىكانىڭ ئۈچ دانە «F-15» تىپلىق ئۇرۇش ئايروپىلانىنى ئېتىپ چۈشۈرگەن.
ئىسمىنى ئاشكارىلاشنى خالىمىغان بىر ئامېرىكا مەنبەسىگە ئاساسلىنىپ ئېلان قىلىنغان خەۋەردە ئەسكەرتىلىشىچە، كۇۋەيتكە تەۋە «F/A-18» تىپلىق بىر ئۇرۇش ئايروپىلانى ئۈچ دانە باشقۇرۇلىدىغان بومبا ئاتقان، بۇ باشقۇرۇلىدىغان بومبىلار ئامېرىكا ئايروپىلانلىرىغا تەگكەن.
ئامېرىكا مەركىزىي قوماندانلىق ئىشتابى (CENTCOM) ۋەزىپە ئىجرا قىلىۋاتقان ئۈچ دانە «F-15E Strike Eagle» تىپلىق ئۇرۇش ئايروپىلانى كۇۋەيت ھاۋا مۇداپىئەسى تەرىپىدىن خاتا ھالدا ئوققا تۇتۇلغان.
ئايروپىلان خادىملىرىدىن تەشكىل تاپقان جەمئىي ئالتە كىشىنىڭ ھەممىسى ئاپتوماتىك سەكرەش ئورۇندۇقىنى ئىشلىتىپ، ئايروپىلاندىن بىخەتەر ھالدا ئايرىلغان.
مەزكۇر مەسىلىدىن خەۋەردار يەنە بىر مەنبەنىڭ «ۋال سترېت ژۇرنىلى» غا بىلدۈرۈشىچە، بۇ ۋەقە ئىرانغا تەۋە بىر ئۇچقۇچىسىز ھاۋا ئاپپاراتى كۇۋەيتتىكى بىر سودا پورتىدىكى تاكتىكىلىق ھەرىكەت مەركىزىگە ھۇجۇم قىلغاندىن كېيىنلا يۈز بەرگەن.
كۇۋەيت كۈچلىرى راداردىن ئامېرىكا ئۇرۇش ئايروپىلانلىرىنىڭ ئۇچۇۋاتقانلىقىنى بايقىغاندىن كېيىن يۇقىرى دەرىجىلىك تەييارلىق ھالىتىگە ئۆتكەن ۋە ئۇلارغا باشقۇرۇلىدىغان بومبا ئېتىپ ئىنكاس قايتۇرغان.
ئامېرىكا بىلەن ئىسرائىلىيە شەنبە كۈنى ئىرانغا ھۇجۇم قىلىپ، دىنىي رەھبەر ئايەتۇللاھ ئەلى خامىنېينىمۇ ئۆز ئىچىگە ئالغان نۇرغۇن يۇقىرى دەرىجىلىك ئەمەلدارلارنى ئۆلتۈرگەن ئىدى.
تېھران بۇنىڭغا قايتۇرما زەربە سۈپىتىدە، ئاساسلىقى رايوندىكى ئامېرىكا ھەربىي بازىلىرى تۇرۇشلۇق بىرنەچچە پارىس قولتۇقى دۆلەتلىرىنى نىشان قىلغان ئۇچقۇچىسىز ھاۋا ئاپپاراتلىرى ۋە باشقۇرۇلىدىغان بومبا ھۇجۇملىرىنى ئېلىپ باردى.
ئامېرىكا مەركىزىي قوماندانلىق ئىشتابىنىڭ باياناتىغا ئاساسلانغاندا، ھەرىكەت جەريانىدا ئىراننىڭ كۇۋەيتتىكى بىر تاكتىكىلىق ھەرىكەت مەركىزىگە قىلغان ھۇجۇمىدا ئالتە ئامېرىكا ئەسكىرى ھاياتىدىن ئايرىلغان، نۇرغۇن كىشى يارلانغان.