ئىسرائىلىيە تەرىپىدىن خەلقئارا دېڭىز تەۋەلىكىدە تۇتۇپ قېلىنغان «يەر شارىۋى سۇمۇد فىلوتى» پائالىيەتچىلىرىنى ئېلىپ ماڭغان ئايروپىلان ئىسرائىلىيەنىڭ ئېلات شەھىرىدىكى رامون ئايرودرومىدىن ئۇچۇپ، شەنبە كۈنى ئىستانبۇلغا يېتىپ كەلدى.
تۈركىيە ھاۋا يوللىرى شىركىتىنىڭ ئايروپىلانى GMT 12:40 دە ئىستانبۇلغا قوندى.
تۈركىيە ئەمەلدارلىرى «يەر شارىۋى سۇمۇد فىلوتى» پائالىيەتچىلىرىنى ئىستانبۇلغا كەلگەندىن كېيىن كۈتۈۋالدى.
تۈركىيە تاشقى ئىشلار مىنىستىرى خاقان فىدان پائالىيەتچىلەرنى قارشى ئېلىپ، ئۇلارنىڭ جاسارىتى ۋە قەتئىي ئىرادىسىگە يۇقىرى باھا بەردى.
ئۇ يەنە قېپقالغان تۈركىيە پۇقرالىرىنىڭ تېزدىن قايتىپ كېلىشىگە كاپالەتلىك قىلىش ئۈچۈن تىرىشچانلىقلارنىڭ داۋاملىشىۋاتقانلىقىنى تەكىتلىدى.
خاقان فىدان بۇ جاسارەتلىك كىشىلەرنىڭ زۇلۇمغا قارشى شەرەپلىك بىر مەيداندا تۇرۇپ، ئادالەت ۋە ئىنسانىي قىممەت قاراشلىرى ئۈچۈن كۈرەش قىلىش ئارقىلىق مەزلۇملارنىڭ ئاۋازىغا ئايلانغانلىقىنى گەۋدىلەندۈردى.
ئانادولۇ ئاگېنتلىقىنىڭ ئىگىلىگەن ئۇچۇرلىرىغا قارىغاندا، پائالىيەتچىلەر رەسمىيەتلىرىنى تاماملىغاندىن كېيىن، چۈشتىن بۇرۇن رامون ئايرودرومىغا قونغان ئايروپىلانغا ئولتۇرۇپ، كېيىن ئىستانبۇلغا قاراپ يولغا چىققان.
ئايروپىلاندا «يەر شارىۋى سۇمۇد فىلوتى» نىڭ 36 تۈركىيە پۇقراسىنى ئۆز ئىچىگە ئالغان 137 ئەزاسى بار ئىدى.
تۈركىيە دىپلوماتىيە مەنبەلىرىنىڭ بىلدۈرۈشىچە، ئايروپىلاندىكىلەر ئارىسىدا ئامېرىكا قوشما ئىشتاتلىرى، ئەرەب بىرلەشمە خەلىپىلىكى، ئالجىرىيە، ماراكەش، ئىتالىيە، كۇۋەيت، لىۋىيە، مالايسىيا، ماۋرىتانىيە، شىۋېتسارىيە، تۇنىس ۋە ئىئوردانىيە قاتارلىق باشقا 12 دۆلەتنىڭ پۇقرالىرىمۇ بار ئىكەن.
بىر تۈرك پائالىيەتچى TRT World قانىلىغا بەرگەن سۆزىدە، ئۇلارنىڭ نەزەربەند ئاستىدا تۇرۇش جەريانىدا ئىسرائىلىيە دائىرىلىرىنىڭ ئىنسانىيەتكە خىلاپ مۇئامىلىسىگە ئۇچرىغانلىقىنى، ئۇلارغا ئۈچ كۈنگىچە سۇ بېرىلمىگەنلىكىنى ۋە ھەتتا ناماز ئوقۇشىغىمۇ يول قويۇلمىغانلىقىنى قوشۇمچە قىلدى.
