تۈركىيە جۇمھۇرىيىتى سودا مىنىستىرى ئۆمەر بولات چارشەنبە كۈنى، تۈركىيە بىلەن سۈرىيەنىڭ تاموژنا جەريانلىرىنى تېزلىتىش ۋە چېگرا ھالقىغان سودىنى ئاشۇرۇشنى مەقسەت قىلغان يېڭى بىر ئورتاق سودا مېخانىزمى ئارقىلىق ئىقتىسادىي ھەمكارلىقنى چوڭقۇرلاشتۇرۇشقا تەييارلىق قىلىۋاتقانلىقىنى ئىپادىلىدى.
بولات، تاموژنا باش ئىدارىسىنىڭ باشلىقى قۇتەيبە ئەھمەد بەدەۋى ۋە سۈرىيە ئىقتىساد ۋە سانائەت مىنىستىرى مۇھەممەد نىدال ئەششائارنى ئۆز ئىچىگە ئالغان سۈرىيەلىك مەسئۇللار بىلەن چېگرا ئۇل ئەسلىھەلىرىنى زامانىۋىلاشتۇرۇش ۋە ئىككى دۆلەت ئوتتۇرىسىدىكى ترانزىت ئۆتۈشلەرنى تېزلىتىش ئۈچۈن تاشلىنىدىغان قەدەملەرنى مۇزاكىرە قىلىش مەقسىتىدە ئايرىم-ئايرىم تېلېفون سۆھبىتى ئۆتكۈزدى.
سۆھبەتتە تاموژنا دەرۋازىلىرىنى زامانىۋىلاشتۇرۇش ۋە كېڭەيتىش، تەرتىپلەرنى ئاددىيلاشتۇرۇش ھەمدە ئۆتكەن يىلى دېكابىردا ھاسىل قىلىنغان دەسلەپكى كېلىشىمدىن كېيىن، تۈركىيە-سۈرىيە ئورتاق تاموژنا كومىتېتىنىڭ تۇنجى نۆۋەتلىك يىغىنىنى چاقىرىش مەسىلىلىرىگە ئەھمىيەت بېرىلدى.
ئۆز-ئارا سودىدىكى ئېشىش
مەسئۇللار يەنە ئەشيا ئوبوروت تورىنى ۋە مەبلەغ سېلىش مۇناسىۋەتلىرىنى كۈچەيتىشنىڭ يوللىرىنىمۇ مۇزاكىىلەشتى.
ئەنقەرەنىڭ رايوندىكى ئۆزگىرىۋاتقان ۋەزىيەتلەرگە ئاساسەن سۈرىيە بىلەن بولغان ئىقتىسادىي مۇناسىۋەتلەرنى كېڭەيتىش ئارزۇسىنى نامايان قىلغانلىقى بىلدۈرۈلدى.
بولات، ئۆز-ئارا سودا سوممىسىنىڭ ئۆتكەن يىلى.7 مىليارد 700 مىليون دوللار بولغانلىقىنى تىلغا ئېلىپ، ئىككى تەرەپنىڭ بۇ ئەتىيازدا ئورتاق ئىقتىساد ۋە سودا كومىتېتى يىغىنىنى ئېچىشقا ھەمدە خۇسۇسىي ساھەنىڭ قاتنىشىشىنى جەلب قىلىشنى مەقسەت قىلغان تېخىمۇ كەڭ كۆلەملىك بىر سودا ۋە مەبلەغ سېلىش مۇنبىرى ئۆتكۈزۈشكە قارار قىلغانلىقىنىمۇ سۆزىگە ئىلاۋە قىلدى.
