ئامېرىكا قوشما ئىشتاتلىرى پىرېزىدېنتى دونالد ترامپ ئىسرائىلىيە بىلەن پەلەستىن قارشىلىق كۆرسىتىش تەشكىلاتى ھاماس ئوتتۇرىسىدا غەززەدە ئۇرۇش توختىتىش كېلىشىمىنىڭ يېقىندا ھاسىل قىلىنىشىنى ئۈمىد قىلىدىغانلىقىنى ئېيتتى.
يەكشەنبە كۈنى مارىلەند ئىشتاتىدىكى «ئاندرېۋس بىرلەشمە بازىسى» دا مۇخبىرلارغا سۆز قىلغان ترامپ: «غەززە سۆھبىتىمىز داۋاملىشىۋاتىدۇ ۋە ئۈمىد قىلىمەنكى، كېلەر ھەپتە ئىچىدە بۇ مەسىلىنى ھەل قىلىمىز» دېدى.
ترامپ ئىلگىرى، قاتار ۋە مىسىرنىڭ ھاماسقا سۇنغان تەكلىپى بىلەن ئىسرائىلىيەنىڭ غەززەدە 60 كۈنلۈك ئۇرۇش توختىتىش ئۈچۈن كېرەكلىك شەرتلەرنى قوبۇل قىلغانلىقىنى ئېلان قىلغان ئىدى.
ھاماس بۇ تەكلىپكە ئىجابىي جاۋاب قايتۇرۇپ، ئۇرۇش توختىتىش كېلىشىمىنى ئىجرا قىلىش ۋە تۇتقۇن ئالماشتۇرۇش ئۈچۈن سۆھبەتلىشىشكە تەييار ئىكەنلىكىنى بىلدۈرگەن ئىدى.
ئىسرائىلىيە ھاماسنىڭ قاتارنىڭ تەكلىپىگە كىرگۈزگەن ئۆزگەرتىشلەرنىڭ قوبۇل قىلغۇسىز ئىكەنلىكىنى ئىلگىرى سۈرگەن بولسىمۇ، ئىسرائىلىيە ھەيئىتى دوھاغا سۆھبەتلىشىش ئۈچۈن بارغان ئىدى.
دوھادىكى سۆھبەتلەر ۋاقىتلىق 60 كۈنلۈك ئۇرۇش توختىتىش، 10 تىرىك ۋە 18 ئۆلۈك ئىسرائىلىيەلىك تۇتقۇننىڭ قويۇپ بېرىلىشى ۋە ئۇزاق مۇددەتلىك ئۇرۇش توختىتىش سۆھبەتلىرىگە مەركەزلەشتى.
نۇرغۇن مەسىلىلەرنىڭ ھەل قىلىنغانلىقى خەۋەر قىلىنغان بولسىمۇ، ئاساسلىق ئىختىلاپ نۇقتىسى ئىسرائىلىيەنىڭ غەززە ئەتراپىدىكى بۇففېر رايونى ئۈستىدىكى كونتروللۇقنى ساقلاپ قېلىشتا چىڭ تۇرۇشى بولدى.
ئۇرۇش توختىتىلغان تەقدىردىمۇ، ئىسرائىلىيە پەلەستىنلىكلەرنى باشقا دۆلەتلەرگە چېگرىدىن قوغلاپ چىقىرىش نىشانىنىڭ بىر قىسمى سۈپىتىدە رەفاھتا ھەربىي مەۋجۇتلۇقىنى داۋاملاشتۇرۇشقا ۋە بىر «يىغىۋېلىش لاگېرى» قۇرۇشقا ئائىت پىلانلىرىنىڭ بارلىقىنى ئېلان قىلدى.
