تۈركىيە جۇمھۇرىيىتى خەزىنە ۋە مالىيە مىنىستىرى مەھمەت شىمشەكنىڭ ئېيتىشىچە، دۇنيا ھېچقانداق دەۋردە كۆرۈلۈپ باقمىغان دەرىجىدىكى قويۇق ئېنىقسىزلىق، قۇتۇپلىشىش، توقۇنۇش ۋە جىددىيچىلىكلەرگە دۇچ كەلمەكتە.
خەزىنە ۋە مالىيە مىنىستىرى مەھمەت شىمشەك، كۈنسېرى كۈچىيىۋاتقان خەلقئارالىق قوغدىنىش سىياسىتى ۋە ئىقتىسادىي پارچىلىنىشقا قارشى تۇرۇش مەقسىتىدە، تۈركىيەنىڭ «تەرەققىيات يولى» ۋە «ئوتتۇرا كارىدور» غا ئوخشاش دۇنياۋى سودا يوللىرىغا سالغان سېلىنمىلىرىنى تەكىتلىدى.
مىنىستىر چارشەنبە كۈنى «Kanal 7» تەرىپىدىن ئۇيۇشتۇرۇلغان «يۈكسىلىۋاتقان تۈركىيە باشلىقلار يىغىنى» دا قىلغان سۆزىدە، تۈركىيەنىڭ باغلىنىشچانلىق ۋە رايون خاراكتېرلىك ئىقتىسادىي بىرلىشىشكە مەبلەغ سېلىش ئارقىلىق، دۇنياۋى پارچىلىنىشقا قارشى دۆلەت مەنپەئەتىگە ئۇيغۇن كارىدورلارنى كۈچەيتىۋاتقانلىقىنى ئىپادىلىدى.
ھېچقانداق دەۋردە كۆرۈلۈپ باقمىغان دەرىجىدە دۇنيانىڭ قويۇق ئېنىقسىزلىققا دۇچ كېلىۋاتقانلىقىنى، قۇتۇپلىشىش، توقۇنۇش ۋە جىددىيچىلىكلەرنىڭ مەۋجۇت ئىكەنلىكىنى ئەسكەرتكەن مەھمەت شىمشەك، ئامېرىكا – ئىسرائىلىيە - ئىران ئۇرۇشى ئېلىپ كەلگەن بەزى ۋاقىتلىق ماكرو ئىقتىسادىي تەسىرلەرنىڭ بارلىقىنى، بازارلاردا دۇنياۋى پۇل پاخاللىقىنىڭ ئۆرلىشى، مالىيە شارائىتىنىڭ مەلۇم دەرىجىدە قىيىنلىشىش خەۋپى ۋە ئىقتىسادىي ئېشىش سۈرئىتىنىڭ تۆۋەنلىشى كۈتۈلۈۋاتقانلىقىنى ئۇقتۇردى.
شىمشەك بەسرەدىن تۈركىيەگە سوزۇلغان تەخمىنەن 1200–1250 كىلومېتىرلىق تۆمۈريول لىنىيەسى، بىر تاشيول ۋە بىر ئېنېرگىيە كارىدورىنى ئۆز ئىچىگە ئالغان «تەرەققىيات يولى» نىڭ بۇ باغلىنىش تىرىشچانلىقلىرىنىڭ بىرى ئىكەنلىكىنى بىلدۈردى.
ئاسىيانى ياۋروپاغا باغلاش
مەھمەت شىمشەك ئەرەب بىرلەشمە خەلىپىلىكى، قاتار ۋە ئىراقنىڭمۇ بۇ لايىھەدە شېرىك سۈپىتىدە ئورۇن ئالغانلىقىنى ئېيتى، «ئوتتۇرا كارىدور» نىڭ ئاسىيانى ياۋروپاغا باغلايدىغان ئاساسلىق كارىدورلارنىڭ بىرى ئىكەنلىكىنى ۋە ئانادولۇدىن ئۆتىدىغانلىقىنى ئەسكەرتتى.
شىمشەك: «ئىستانبۇلدىكى 3-كۆۋرۈك ۋە بۇ كۆۋرۈكتىن ئۆتىدىغان تۆمۈريول ئۇلىنىشى ئۈچۈن ئالاھىدە كەڭ ياسالدى، بۇ ئوتتۇرا كارىدورنىڭ ئەڭ مۇھىم تەركىبىي قىسمى بولۇپ، 8.1 مىليارد دوللارلىق بىر تۈر ھېسابلىنىدۇ» دېدى ھەمدە بۇ لايىھەگە كېرەكلىك مەبلەغنىڭ %83 نى خەلقئارالىق مالىيە ئورگانلىرىنىڭ تەمىنلەيدىغانلىقىنى ئېيتتى.
مىنىستىر يەنە تۈركىيەنىڭ ئوتتۇرا كارىدورنى كۈچەيتىش ئۈچۈن دۇنيا بانكىسى بىلەن بىر كېلىشىم ئىمزالىغانلىقىنى ئەسكەرتتى.
