رۇسىيە مۇداپىئە مىنىستىرلىقى، ئودېسسا پورتىدىكى ئۇل ئەسلىھە ئورۇنلىرى بىلەن ئۇكرائىنا ئارمىيەسىگە يۈك توشۇۋاتقانلىقى بىلدۈرۈلگەن ئىككى پاراخوتقا يۇقىرى ئېنىقلىقتىكى قوراللار ۋە ئۇچقۇچىسىز ئايروپىلانلار ئارقىلىق زەربىگە بېرىلگەنلىكىنى مەلۇم قىلدى.
رۇسىيە مۇداپىئە مىنىستىرلىقى تەرىپىدىن ئېلان قىلىنغان باياناتتا، رۇسىيە قوراللىق كۈچلىرىنىڭ كېچە سائەتلىرىدە ھاۋا ۋە قۇرۇقلۇقتىن ئېتىلىدىغان يۇقىرى ئېنىقلىقتىكى قوراللار بىلەن ھۇجۇمچى ئۇچقۇچىسىز ئايروپىلانلارنى ئىشلىتىپ، ئۇكرائىنادىكى نىشانلارغا قارىتىلغان ھۇجۇملىرىنى داۋاملاشتۇرغانلىقى بىلدۈرۈلدى.
باياناتتا، ھۇجۇملار نەتىجىسىدە ئودېسسا دېڭىز سودا پورتىدا ھەربىي مەقسەتلىك يۈكلەرنى چۈشۈرۈش ۋە ساقلاش ئۈچۈن ئىشلىتىلىدىغانلىقى بىلدۈرۈلگەن پورت ئۇل ئەسلىھەلىرى بىلەن ئۇكرائىنا ئارمىيەسىنىڭ ئېھتىياجى ئۈچۈن ئاجرىتىلغان يېقىلغۇ ئامبارلىرىغا زەربە بېرىلگەنلىكى تەكىتلەندى.
ئودېسسانىڭ 15 ۋە 53 كىلومېتىر جەنۇبىي شەرقىدىكى دېڭىزدا كېتىۋاتقان بىر قۇرۇق يۈك پاراخوتى بىلەن بىرلىكتە يەنە بىر يۈك پاراخوتىنىڭمۇ نىشانغا ئېلىنغانلىقى تەكىتلەنگەن باياناتتا يەنە، «مەزكۇر پاراخوتلارنىڭ ئودېسسا ۋە چېرنومورىسك پورتلىرىغا ئۇكرائىنا ئارمىيەسى ئۈچۈن يۈك توشۇۋاتقانلىقى» بىلدۈرۈلدى.
ئودېسسادا «نوۋايا پوچتا» لوجىستىكا مەركىزىمۇ زەربىگە ئۇچرىدى
ئودېسسا شەھىرىدە ھەربىي مەقسەتلىك يۈكلەرنى ساقلاش ئۈچۈن ئىشلىتىلىدىغانلىقى بىلدۈرۈلگەن «نوۋايا پوچتا» شىركىتىگە ئائىت لوجىستىكا مەركىزىنىڭمۇ زەربىگە ئۇچرىغانلىقىغا ئىشارەت قىلىنغان باياناتتا، ئودېسسانىڭ 25 كىلومېتىر شىمالىي غەربىدىكى كوۋالېۋكا ئاھالىلەر رايونى يېقىنلىرىدا «نېپتون-2» قىرغاق مۇداپىئە راكېتا سىستېمىسى باتارېيەسىنىڭ نىشانغا ئېلىنغانلىقى، ئىككى راكېتا ئاتقۇچى ئاپتوموبىل بىلەن بىر يۈك توشۇش ماشىنىسىنىڭ يوقىتىلغانلىقى ئۇقتۇرۇلدى.
