ئاۋسترالىيە ۋە ۋېتنام كەڭ دائىرىلىك ئىستراتېگىيەلىك شېرىكلىكلىرىنى چوڭقۇرلاشتۇرۇپ، مۇداپىئە ۋە بىخەتەرلىك ساھەسىدە ھەمكارلىقنى ئاشۇرۇش مەسىلىسىدە پىكىر بىرلىكى ھاسىل قىلدى.

ئاۋسترالىيە باش مىنىستىرلىق ئىشخانىسىدىن ئېلان قىلىنغان باياناتتا، ئاۋسترالىيە باش مىنىستىرى ئانتونى ئالبانېسنىڭ ۋېتنام زىيارەتى جەريانىدا دۆلەت رەئىسى تو لام بىلەن كۆرۈشكەنلىكى بىلدۈرۈلدى.

باياناتتا، رەھبەرلەرنىڭ ئىككى دۆلەت ئوتتۇرىسىدىكى كەڭ دائىرىلىك ئىستراتېگىيەلىك شېرىكلىكنى چوڭقۇرلاشتۇرۇش مەسىلىسىدە پىكىر بىرلىكى ھاسىل قىلغانلىقى، مۇداپىئە، بىخەتەرلىك ۋە سودا ساھەلىرىدە ھەمكارلىقنى كۈچەيتىش ئۈچۈن كېلىشكەنلىكى ئەسكەرتىلدى.

ئىككى دۆلەتنىڭ خادىملارنى تەربىيەلەش، ئۇچۇر تەڭشەش، سەھىيە، دېڭىز بىخەتەرلىكى ۋە ئىزدەش-قۇتقۇزۇش خىزمەتلىرىدىن باشقا، تور جىنايەتلىرى، توردا ئالدامچىلىق قىلىش، ئادەم ئەتكەسچىلىكى ۋە تېررورلۇققا قارشى كۈرەش قاتارلىق مەسىلىلەردە ھەمكارلىقنى ئاشۇرۇش مەسىلىسىدە كېلىشكەنلىكى بىلدۈرۈلگەن باياناتتا يەنە، ئالبانېس ۋە تو لامنىڭ جەنۇبىي خىتاي دېڭىزىدىكى ۋەزىيەتتىن «ئەندىشە قىلىۋاتقانلىقى» ئۇقتۇرۇلدى.

باياناتتا، رەھبەرلەرنىڭ جەنۇبىي خىتاي دېڭىزىدا تىنچلىق، بىخەتەرلىك، مۇقىملىق ۋە كېمە قاتنىشى ئەركىنلىكىنىڭ قوغدىلىشىنىڭ مۇھىملىقىنى تەكىتلەپ، كەسكىنلىكلەرنىڭ دىئالوگ يولى بىلەن ھەل قىلىنىشى چاقىرىقىدا بولغانلىقى بىلدۈرۈلدى.

ئالبانېس ۋە تو لامنىڭ جەنۇبىي شەرقىي ئاسىيا دۆلەتلىرى ئىتتىپاقىنىڭ (ASEAN) مىيانماردىكى كرىزىسنى ھەل قىلىش ئۈچۈن كېلىشكەن 5 ماددىسىنىڭ ئىجرا قىلىنىشى ۋە «زوراۋانلىقنىڭ دەرھال ئاخىرلىشىشى، ئىنسانپەرۋەرلىك ياردەمنىڭ توسالغۇسىز يېتىپ بارالىشى ۋە ئومۇمىي دىئالوگنىڭ قۇرۇلۇشى» چاقىرىقىدا بولغانلىقى ئەسكەرتىلدى.