روسئاتوم باش مۇدىرى ئالېكسېي لىخاچېۋ ئېلان قىلغان باياناتىدا، كونتېينېر پاراخوتى «يىئانىنا» غا قىلىنغان ھۇجۇمغا ئائىت تەپسىلاتلارنى ھەمبەھىرلىدى.

پاراخوتقا قارا دېڭىزدا ئىككى ئۇچقۇچىسىز ئايروپىلان بىلەن ھۇجۇم قىلىنغانلىقىنى بىلدۈرگەن لىخاچېۋ: «پاراخوت خەلقئارا سۇ تەۋەلىكىدە توڭلىتىلغان يېمەك-ئىچمەك بىلەن قۇرۇلۇش ۋە بېزەكچىلىك ماتېرىياللىرىغا ئوخشاش پۇقراۋى ماللارنى توشۇۋاتقان ئىدى. بۇ ھۇجۇمنى دېڭىز قاراقچىلىقىدىن باشقا نەرسە بىلەن ئىزاھلىغىلى بولمايدۇ» دېدى.

لىخاچېۋ چۆكۈشكە باشلىغان پاراخوتنى ئۆلچەملىك ھالدا تەرك ئەتكەن 17 كىشىلىك پاراخوت خادىملىرىنىڭ ھەممىسىنىڭ قۇتقۇزۇۋېلىنغانلىقىنى ۋە سالامەتلىك ئەھۋالىنىڭ ياخشى ئىكەنلىكىنى ئېيتتى.

پاراخوت خادىملىرىدىن 16 كىشىنىڭ مىسىر پۇقراسى بولغان بىر كاپىتان باشقۇرۇشىدىكى «دېلفىنۇس» پاراخوتى تەرىپىدىن قۇتقۇزۇۋېلىنغانلىقىنى ئەسكەرتكەن لىخاچېۋ، ئەڭ ئاخىرقى خادىمنىڭ بولسا روسىيە قارا دېڭىز فلوتىغا قاراشلىق دېڭىز ئاۋىياتسىيە ئەترەتلىرى تەرىپىدىن قىرغاققا يەتكۈزۈلگەنلىكىنى بىلدۈردى.

ئۇكرائىنا دۆلەت رەئىسى ۋولودىمىر زېلېنسكىي روسىيەدىكى 3 نېفىت ئايرىش زاۋۇتى بىلەن روسىيە بايرىقى قادالغان «يىئانىنا» ناملىق كونتېينېر پاراخوتىغا ھۇجۇملار قىلغانلىقىنى بىلدۈرگەن ئىدى.

تەخمىنەن 140 مېتىر ئۇزۇنلۇققا ۋە 22 مېتىر كەڭلىككە ئىگە «يىئانىنا» پاراخوتى 13 مىڭ توننا يۈك كۆتۈرۈش ئىقتىدارىغا ئىگە ئىدى.

روسىيەنىڭ ۋىلادىۋوستوك پورتىغا تىزىملاتقان بۇ پاراخوت ھىندىستان، بىرلەشمە ئەرەب خەلىپىلىكى ۋە نوۋوروسسىيسك ئوتتۇرىسىدىكى لىنىيەدە قاتنىماقتا ئىدى.