فىرانسىيە ھۆكۈمىتى ئامېرىكا قوشما ئىشتاتلىرىنىڭ ۋەزىپە ئۆتكۈزۈۋېلىش ئالدىدىكى پىرېزىدېنتى دونالد ترامپنىڭ گرونلاندىيەنىڭ ئامېرىكانىڭ كونتروللۇقىدا بولۇشى كېرەكلىكى ھەققىدىكى باياناتلىرىغا قارشى چىقىپ، ياۋروپا ئىتتىپاقىنىڭ ئىگىلىك ھوقۇقلۇق چېگرالىرىغا قىلىنغان ھۇجۇملارغا يول قويۇليمايدىغانلىقىنى بىلدۈردى.
فىرانسىيە تاشقى ئىشلار مىنىستىرى جىن-نوئېل باررو بىر رادىيو پىروگراممىسىدا سۆز قىلىپ، ترامپنىڭ دۆلىتى ۋە دانىيە ئەزا بولۇپ كىرگەن ياۋروپا ئىتتىپاقىنىڭ ئىگىلىك ھوقۇقلۇق چېگرالىرىغا مۇناسىۋەتلىك باياناتلىرىغا نارازىلىق بىلدۈردى.
ترامپنىڭ باياناتلىرىنى قوبۇل قىلغىلى بولمايدىغانلىقىنى بىلدۈرگەن باررو: «ياۋروپا ئىتتىپاقىنىڭ دۇنيادىكى باشقا دۆلەتلەرنىڭ، قايسى دۆلەت بولۇشىدىن قەتئىينەزەر، ئۆزىنىڭ ئىگىلىك ھوقۇقلۇق چېگرالىرىغا ھۇجۇم قىلىشىغا يول قويۇشى مۇمكىن ئەمەس» دېدى.
ئامېرىكادا ۋەزىپە ئۆتكۈزۈۋېلىشقا تەييارلىنىۋاتقان ترامپ، 23-دېكابىر كۈنى ئىجتىمائىي تاراتقۇ سۇپىسى —Truth Social دىكى ئادرېسىدا ئۇچۇر ھەمبەھرىلەپ، گرونلاندىيەنىڭ ئامېرىكانىڭ كونتروللۇقىدا بولۇشى كېرەكلىكى ھەققىدىكى سۆزىنى تەكرارلىغان ھەمدە ئارالنىڭ ئىگىلىك ھوقۇقى ۋە كونتروللۇقىغا ئىگە بولۇشنىڭ «مۇتلەق زۆرۈرىيەت» ئىكەنلىكىنى ئوتتۇرىغا قويغانىدى.
گرونلاندىيە باش مىنىستىرى مۇتې بورۇپ ئېگېدې بولسا گرونلاندىيەنىڭ «سېتىلىدىغان نەرسە ئەمەسلىكى»نى، ئۆزلىرىنىڭ ئەركىنلىك كۈرەشلىرىنى داۋاملاشتۇرىدىغانلىقلىرىنى بىلدۈرگەنىدى.
